कोरोना भाइरस संक्रमित पुरुषको शुक्रकिटको गुणस्तर खस्किँदै गएको एक अनुसन्धानले दाबी गरेको छ ।

भारतको पटना, दिल्ली र आन्ध्र प्रदेशमा गरिएको अनुसन्धानमा संक्रमित पुरुषको शुक्रकिटको गुणस्तर खस्किएको पाइएको हो ।

भारतीय सञ्चारमाध्यमका अनुसार कोरोनाको उपचार गराइरहेका १९–४३ वर्ष उमेरका ३० पुरुषको शुक्रकिटको अनुसन्धान गर्दा यस्तो तथ्य बाहिर आएको हो । अनुसन्धान अनुसार संक्रमित भएको १० हप्तासम्म पनि शुक्रकिटमा समस्या देखिएको थियो ।

अनुसन्धानका क्रममा स्पर्मको आकार, स्पर्मको संख्या र स्पर्मको गतिशीलतालाई मापन गरिएको थियो । सिड्स अफ इनोसेन्स आईबीएफ सेन्टरकी संस्थापक गौरी अग्रवालले विश्वभर कोरोनाका कारण पुरुषको प्रजनन् क्षमतामा आएको कमीबारे अनुसन्धान भइरहेको बताइन् ।