प्रधानमन्त्री पुष्पकमल दाहाल 'प्रचण्ड'ले कानून बनाएर भए पनि जेलमा रहेका रेशम चौधरीलाई छुटाउने प्रतिबद्धता जनाएका छन् । 

विश्वासको मतका सम्बन्धमा उठेका प्रश्नको जवाफ दिँदै प्रचण्डले रेशमलाई अन्याय भएको भन्दै छुटाउने बताएका हुन् ।

‘रेशम चौधरीका विषयमा गम्भीरता र मार्मिक ढंगले कुरा उठेको छ । संसद्ले मार्मिकता र संवेदनशीलताको रूपमा लिएको छ । हामीले पनि रेशम चौधरी त्यो घटनामा संलग्न हुनुभएको छैन । रेशमलाई अन्याय भएको छ भन्दै आएका छौं,’ प्रचण्डले भने, ‘उहाँलाई अध्यादेश ल्याएर भए पनि छुटाउनुपर्छ भनेर पनि पहल गरिएको थियो । यही संसद्बाट ऐन कानून बनाएर छुटाउने वातावरण बनाइन्छ । सत्ता साझेदारबीच छलफल गर्दा पनि यो विषय उठेको छ । ऐन बनाएर उहाँलाई छुटाइनेछ भन्ने विश्वास दिलाउँछु ।’

त्यसअघि रेशम चौधरीकी पत्नी एवं नागरिक उन्मुक्ति पार्टीकी संसदीय दलकी नेता रञ्जिता श्रेष्ठले क्षमा होइन, न्याय दिन माग गरेकी थिइन् ।

एकीकृत समाजवादीका अध्यक्ष माधव नेपाल लगायत सांसदले पनि रेशम चौधरीलाई छाड्नुपर्ने माग गरेका थिए ।