प्रधानमन्त्री पुष्पकमल दाहाल प्रचण्डले प्रतिनिधिसभामा 'प्रचण्ड' बहुमत प्राप्त गरेका छन् ।

संसदमा विश्वासको मतका लागि मंगलवार भएको मत विभाजनमा पक्षमा २६८ र विपक्षमा जम्मा २ मत प्राप्त भएको हो ।

जम्मा २७० मत खस्दा ५ जना मतदानमा सहभागी भएनन् ।

पशुपति शमशेरले जेष्ठ सदस्यको हैसियतमा बैठक सञ्चालन गरेकाले मत दिन पाएनन् भने कांग्रेसका ४ सांसद बैठकमा उपस्थित थिएनन् ।

अनुपस्थित ४ मध्ये मनाङका टेकबहादुर गुरुङ निलम्बनमा रहेकाले शपथ समेत लिएका छैनन् ।

कांग्रेसकै अन्य सांसदहरू मनोरमा शेरचन, किशोरसिंह राठोर र अम्बिका बस्नेत पनि अनुपस्थितिका कारण मतदान प्रक्रियामा सहभागी थिएनन् ।

१६९ सांसदको समर्थनसहित प्रधानमन्त्रीमा दाबी गरे पनि अन्तिममा नेपाली कांग्रेस, नेकपा एस र लोसपाले समेत मत दिएका हुन् ।

यससँगै प्राविधिक हिसाबले प्रतिनिधिसभा प्रतिपक्षविहीन जस्तै बनेको छ ।

८९ सीट जितेको कांग्रेस, ७९ सीट रहेको एमाले, ३२ सीट जितेको माओवादी, २० सीट जितेको रास्वपा, १४ सीट जितेको राप्रपा, १२ सीट जितेको जसपा, १० सीट जितेको नेकपा एस, ६ सीट जितेको जनमत पार्टी, ४ सीट जितेको नागरिक उन्मुक्ति र ३ स्वतन्त्र सांसद पनि प्रधानमन्त्री प्रचण्डको पक्षमा देखिएका छन् ।

विपक्षमा मत दिनेमा १ सीट रहेको नेमकिपा र १ सीट नै रहेको राष्ट्रिय जनमोर्चा मात्र छन् ।

कांग्रेसले भने विश्वासको मत दिए पनि आफूहरू प्रतिपक्षमै बस्ने जनाएको छ ।