प्रदेश १ प्रदेश सभाको सभामुखमा नेकपा माओवादी केन्द्रका बाबुराम गौतमको एकल उम्मेदवारी परेको छ ।

प्रमुख प्रतिपक्षी दल नेपाली कांग्रेसले उम्मेदवारी नदिएपछि उनको एकल उम्मेदवारी परेको हो । गौतमलाई एकीकृत समाजवादीले पनि समर्थन गरेको थियो । 

ओखलढुंगाको क्षेत्र नम्बर २ बाट निर्वाचित सांसद बाबुराम गौतमको प्रस्तावकमा एमालेका रेवतीरमण भण्डारी छन् भने समर्थकमा एकीकृत समाजवादीका कमल जवेगु, माओवादी केन्द्रका नारायण बुर्जा मगर र राप्रपाका गोपालबहादुर विश्वकर्मा छन् । 

प्रदेश १ सरकारको मुख्यमन्त्री एमाले र सभामुख माओवादीले पाउने गरी यसअघि नै केन्द्रमा सहमति भइसकेको छ । कांग्रेसले उपसभामुख दिन एमालेसँग माग गरेको छ ।  मुख्यमन्त्री समेत रहेका एमाले  संसदीय दलका नेता हिक्मत कार्कीलाई भेटेर उपसभामुख कांग्रेसलाई दिन आग्रह गरिएको छ । 

कार्कीले पार्टीभित्र सल्लाह गरेर निर्णय गर्ने बताएका कांग्रेसका एक सांसदले बताए । 

अहिलेकै अवस्था कायम रहिरहे गौतमले ६४ मत प्राप्त गर्नेछन् । उनलाई एमालेका ४०, माओवादी केन्द्रका १३, राप्रपाका ५ र जसपाका १ र नेकपा एसका ४ गरी ६४ सांसदको समर्थन प्राप्त हुनेछ ।

९३ सांसद रहेको प्रदेश सभामा बहुमतका लागि ४७ सांसद आवश्यक पर्छन् । मनोनयनको समयसम्म १ जनाको मात्रै उम्मेदवारी परेको संसद सचिवालयका सचिव गोपाल पराजुलीले बताए । 

मनोनयनको समय साँझ ५ बजेसम्म तोकिएको थियो  । सभामुखको निर्वाचन पुस २८ गते हुनेछ ।