नागरिकता विवादमा सांसद पद खारेजसँगै गृहमन्त्री पनि गुमाएका राष्ट्रिय स्वतन्त्र पार्टीका सभापति रवि लामिछानेले पार्टीलाई सरकारबाटै फिर्ता गराउनेसम्मको तयारी गरेका छन् ।

गैरसांसदकै रुपमा आफूलाई गृहमन्त्री बनाउन प्रधानमन्त्री पुष्पकमल दाहाललाई रविले पटकपटक दबाब दिंदै आएका थिए । 

बिहीबार बिहान पनि रवि प्रधानमन्त्रीलाई भेट्न बालुवाटार पुगेका थिए । सो भेटमा पनि रविले आफूलाई गृहमन्त्री दिन दबाब दिएका थिए । 

‘राष्ट्रिय स्वतन्त्र पार्टीका सभापति रविजी बिहीबार बिहान पनि बालुवाटार आउनुभएको थियो । यसअघि जस्तै उहाँको कुरा त्यही गृहको नै हो’, बालुवाटार स्रोतले भन्यो, ‘प्रधानमन्त्रीबाट पहिले जस्तै अदालतको पूर्णपाठ आउन दिनुस् अनि एउटा टुंगोमा पुगौंल भन्ने जवाफ आएपछि उहाँ फर्किनुभएको थियो । त्यसपछि सामाजिक संजाललमा लेख्ने र पार्टीको बैठक बोलाउनेसम्मको तयारी गर्नुभएको होला ।’

प्रचण्डले सर्वोच्च अदालतले मुद्दामा पूर्णपाठ पनि नदिएको भन्दै हतार नगर्न भनेका थिए । तर प्रचण्डको  जवाफ सकारात्मक नआएपछि फर्किएलगत्तै रविले सामाजिक संजालमा धम्कीपूर्ण रुपमा केही नगरे आजै मौनता तोड्ने चेतावनी दिएका थिए ।

'अब मलाई भन्न बाँकी,गर्न बाँकी, लेख्न बाँकी केही भए भनीहाल्नुहोला, गरीहाल्नु होला, लेखिहाल्नु होला। मेरो मौनता आज सम्मका लागि मात्रै हो। म अभिमन्यु होइन।ु लामिछानेले लेखेका थिए । 

रविले स्टाटस लेखेलगत्तै रास्वपाले आजै दिउँसो साढे ४ बजेलाई पार्टीको केन्द्रीय समिति र संसदीय दलको संयुक्त बैठक बोलाएको छ ।

यही यो बैठकबाट पार्टीलाई सरकारबाट फिर्ता बोलाउनेसम्मको निर्णय गर्ने तयारीमा रास्वपा पुगेको छ ।

रविको नागरिकतामात्रै होइन अरू मन्त्रीका विषयमासमेत प्रश्न उठेपछि नयाँ पार्टीका रूपमा उदाएको रास्वपामाथि चौतर्फी दबाब परेको छ ।

यसअघि पनि रविले दुईपटक प्रधानमन्त्रीसँग भेट गरी आफूलाई गृहमन्त्रालयमा फर्काउन प्रधानमन्त्रीलाई दबाब दिएका थिए ।

तर प्रधानमन्त्री प्रचण्ड नागरिकता र पासपोर्ट विवादमा मुछिएका रविलाई तत्काल कुनै हालतमा गृह मन्त्री बनाउन तयार नभएका हुन् ।