नेकपा माओवादी केन्द्रको पदाधिकारीमा नेता अग्नि सापकोटाको इन्ट्री भएको छ । संघीय संसदको अघिल्लो कार्यकालमा सभामुख चयन भएपछि पार्टी राजनीतिमा नरहेका उनी कार्यकाल सकिएसँगै उपाध्यक्ष चयन भएका हुन् । 

पार्टीको माघ २१ गते सम्पन्न स्थायी समिटीको बैठकको निर्णयअनुसार उनलाई उपाध्यक्षमा चयन गरिएको हो । माओवादी केन्द्रका एक नेताले सापकोटालाई उपाध्यक्ष महरापछिको बरियता रहनेगरी उपाध्यक्ष चयन गरिएको जानकारी दिए । 

ती नेताका अनुसार यसअघि उपमहासचिवको जिम्मेवारीमा रहेकी नेतृ पम्फा भुसालको पनि बढुवा भएको छ । उनलाई सापकोटासँगै उपाध्यक्षमा चयन गरिएको ती नेताको भनाइ छ । 
उनका अनुसार २२ सदस्यीय पदाधिकारीमा अध्यक्ष प्रचण्डसहित वरिष्ठ उपाध्यक्षमा नारायणकाजी श्रेष्ठ रहेका छन् । 

यसैगरी उपाध्यक्षमा महरा, सापकोटा र भुसाल चयन हुँदा महासचिवमा यसअघि नै देव गुरुङ चयन भइसकेका छन् । यस्तै उपमहासचिव ६ जनामा गिरिराजमणि पोखरेल, वर्षमान पुन, हरिबोलप्रसाद गजुरेल, जनार्दन शर्मा, शक्ति बस्नेत र मातृका प्रसाद यादव रहेका छन् भने सचिवमा दिनानाथ शर्मा, चक्रपाणि खनाल, देवेन्द्र पौडेल, लीलामणि पोख्रेल, गणेश साह, हितमान शाक्य, हितराज पाण्डे, डिलाराज आचार्य र सुरेन्द्र कुमार कार्की रहेका छन् । यस्तै कोषाध्यक्षमा श्रीमान ढकाल रहेका छन् । 

माओवादी स्थायी कमिटीको बैठकअनुसार १३ बुँदे सर्कुलर पनि पठाइएको ती नेताको भनाइ छ ।