संविधानसभा सदस्य सावित्रा दुराले सशस्त्र युद्धको बेला राज्यले बेपत्ता बनाएका व्यक्तिहरू सार्वजनिक गर्न माग गरेकी छन् ।

नेत्रविक्रम चन्द नेतृत्वको नेपाल कम्युनिष्ट पार्टी (नेकपा) की पोलिटब्युरो सदस्य समेत रहेकी दुराले युद्धका क्रममा एक हजार ९६ जना बेपत्ता भएको पार्टीमा तथ्यांक रहेको दाबी गरिन् ।

आफ्ना पति अखिल क्रान्तिकारीका तत्कालीन महासचिव पूर्ण पौडेल २०५९ साल वैशाख १३ गतेदेखि बेपत्ता भएको उल्लेख गर्दै दुराले बेपत्ताहरूको अवस्था सार्वजनिक नहुँदा परिवारजन पीडामा बाँच्न बाध्य भएको बताइन् ।

‘राज्यले बेपत्ताको कि सास दिनुपर्‍यो कि लास दिनुपर्‍यो’, दुराले भनिन्, ‘एक जना हैन दुई जना हैन, झण्डै एघार सय जना नागरिक बेपत्ता छन्, यति ठूलो संख्यामा देशका नागरिक बेपत्ता हुँदा उनीहरूका परिवारप्रति सरकार संवेदनशील हुनुपर्दैन ?’

नेकपाले जनयुद्ध दिवसको अवसर पारेर बुटवलमा गरेको अन्तर्क्रियामा नेतृ दुराले बेपत्ता व्यक्तिका परिवारहरू जीविकोपार्जन,शिक्षा दिक्षा र रोजगारी जस्ता बुहुआयामिक समस्याबाट गुज्रिन बाध्य भएको बताइन् ।

सशस्त्र युद्धका कमाण्डर पुष्पकमल दाहाल 'प्रचण्ड' प्रधानमन्त्री भए पनि उनी नङग्राविनाको बाघजस्तै खोक्रो भएको दुराले टिप्पणी गरिन्।

उनी नेतृत्वको सरकारले बेपत्ता र शहीद परिवारका समस्या समाधानमा चासो नराखेको उनको आरोप थियो।

माओवादी केन्द्र संसदीय भासबाट बाहिर आएर सबै पूर्वमाओवादीहरू एक भएर वैज्ञानिक समाजवादी शासन व्यवस्था स्थापनाबाट मात्र नागरिकका समस्या समाधान हुने उनले बताइन् ।

नेपाली सेनाबाट पति मारिएकी बुटवलकी जया पौडेलले माओवादी युद्धमा मारिएकालाई सरकारले राष्ट्रिय शहीद घोषणा गरी सम्मान दिनुपर्ने बताइन् ।

सरकारले दिएको १० लाखले युद्धमा ज्यान गुमाएकाको परिवारको जीविकोपार्जन हुन नसक्ने उनले गुनासो गरिन् ।