नेकपा एमाले मोरङले  मिसन ग्रासरुट अभियानमा विद्यालयमा फूलबारी अभियानदेखि तरकारीमा आत्मनिर्भर बन्ने अभियानसम्म सञ्चालन गर्ने भएको छ । 

मंगलवार बसेको एमाले मोरङको जिल्ला कमिटीको विशेष बैठकले अभियानका क्रममा सामुदायिक विद्यालय शिक्षा सुधार, स्वास्थ्य र पोषणको जानकारी, विद्यालयमा फूलबारी अभियान सञ्चालन गर्नेलगायत निर्णय गरेको जिल्ला अध्यक्ष अध्यक्ष ऋषिकेश पोख्रेलले बताए ।

पोखरेलका अनुसार, संगठनात्मक र वैचारिक कामसँगै समाजसँग जोडिएका धेरै क्षेत्रमा अभियान सञ्चालन गरिनेछ।

अभियानका क्रममा एमालेले स्वास्थ्य केन्द्रहरूको सरसफाइसमेत गर्ने जनाएको छ ।

यस्तै ज्येष्ठ नागरिकहरूको संस्थामा सहयोग, सम्मान गर्ने कार्यसूची बनाएको एमाले मोरङले भजन, कीर्तन मण्डलीबीच छलफल गर्ने र वडास्तरीय प्रतिस्पर्धात्मक भजन-कीर्तन गराई पुरस्कारको व्यवस्था गर्ने जनाएको छ ।

सहकारी तथा साना किसानहरूको भेला आयोजना गरी विषयगत प्रशिक्षण दिने पनि योजना एमालेले बताएको छ। 

त्यस्तै सामुदायिक वन उपभोक्ताहरूको समेत भेला र प्रशिक्षण दिइने छ।

धाँमी, झाँक्री, ज्योतिषहरू र आयुर्वेद औषधि प्रयोग गर्नेहरूसँग पार्टी नेतृत्वको समूहले भेटघाट गर्ने र उनीहरूलाई अहिलेको परिवर्तित सन्दर्भ र परम्परागत प्रणालीबीच अन्तरसंवाद पनि गराइने एमाले मोरङले जनाएको छ। 

यसैगरी उत्कृष्ट योगदान गर्नेहरूका घरघरमा गएर सम्मान गर्ने तथा गुनासाहरूको अध्ययन गर्ने पनि एमालेको कार्यक्रममा छ।

समाजमा रहेका विभिन्न धार्मिक/सास्कृतिक समूहसँग दुःखसुखका कुरा गर्ने पनि अभियानमा समेटिएको छ । एमालेका सबै पार्टी सदस्यहरूलाई अनिवार्य करेसाबारी बनाउन लगाउने र तरकारीमा आत्मनिर्भर बन्न पनि सिकाइने जनाइएको छ। 

पार्टी सदस्यले कम्तीमा एउटा फलफूलको बिरुवा रोप्न अनिवार्य गरिएको छ । किसानहरूका समस्या समाधानका लागि जैविक मल बनाउने प्राविधिकसँग समन्वय गरेर किसानलाई सीप सिकाउने र मलमा आत्मनिर्भर हुन उत्प्रेरित गर्नेसम्म एमालेको योजना बनाइएको छ।

एमालेका पोलिटब्युरो सदस्य देवेन्द्र दाहाल, जितु गौतम, जगदीशप्रसाद कुसियतलगायत दुई महिने पार्टी सुदृढीकरण तथा विस्तार अभियान लिएर मोरङमा खटिएका छन् । 

फागुन ५ गते औपचारिक रुपमा संगठन सुदृढीकीरण गर्ने उद्देश्यका साथ देशभर जनतासम्म पुग्नेगरी पार्टीका नेताहरूलाई जिम्मेवारी दिँदै आ–आफ्ना क्षेत्रमा परिचालन गरेको छ ।