नेपाल विद्युत् प्राधिकरणका कार्यकारी निर्देशक कुलमान घिसिङले प्राधिकरणको कारण कुनै पनि ठाउँमा चक्रपथ बिस्तारमा समस्या नरहेको स्पष्ट पारेका छन्। 

बिहीबार दोस्रो चरणको चक्रपथ बिस्तारअन्तर्गत कलंकी–बसुन्धारा सडक खण्डकको अवलोकनका लागि उपप्रधान एवं भौतिक पूर्वाधार तथा यातायात मन्त्री नारायणकाजी श्रेष्ठ र नेपालका लागि चिनियाँ राजदुत चान् सङसँगै अनुगमन एवं निरीक्षणका लागि घिसिङ त्यहाँ पुगेका थिए। 

कलंकी बसुन्धारा सडक खण्डमा अब १५ वटा पोल जति हटाउन बाँकी रहेको र ती पोलहरु १५ दिन भित्रमा हटाइसक्ने उनले बताए।

उनले भने, ‘अब यो रिङरोड बिस्तारको कलंकी चाबहिलसम्मको बिस्तारमा हामीले पोल सार्ने काम सकिसकेका छौँ । एक, दुई स्थानमा रोडको लेभल मिलाउनुपर्ने भएकाले १५ वटा जति पोल सार्न बाँकी रहेछ, १५ दिनजति लाग्छ । विद्युत प्राधिकरणको पोलको कारणले कुनै पनि ठाउँमा चक्रपथ बिस्तारका लागि समस्या छैन ।’

त्यस्तै  काठमाडौं चक्रपथ सुधार योजनाकी योजना प्रमुख सजना अधिकारीले चक्रपथ बिस्तारको कलंकीदेखि बसुन्धरासम्म ८.२ किलोमिटर दोस्रो चरणमा शुरु हुन लागेको पनि बताइन्। 

उनले जसअन्तर्गत रहेका करिब तीन सय बिजुलीका पोलहरू हटाइसकेको र अब २२ वटा पोलहरू मात्रै रहेकाले सडक बिस्तारका लागि कुनै समस्या नभएको बताइन्। 

सडक छेउमा रहेका १९ वटा मन्दिरहरूमा गोंगबुमा रहेको मन्दिर बाहेक अन्य सबै मन्दिरहरू स्थानान्तरण गरिसकेको पनि उनले बताए। दोस्रो चरणमा चक्रपथ बिस्तार कलंकीदेखि बसुन्धारासम्म मात्रै रहेको उनको भनाइ थियो।

दोस्रो चरणको चक्रपथ बिस्तारअन्तर्गत आज बिहान मन्त्री श्रेष्ठसहित नेपालका लागि चिनियाँ राजदुत, काठमाडौं महानगरपालिकाका प्रमुख बालेन्द्र साह लगायतले सडक अनुगमन एवं निरीक्षण गरेका थिए।