नेपाली कांग्रेसका महामन्त्री गगनकुमार थापाले कसैले पनि गठबन्धन भत्काउने धराप नथाप्न चेतावनी दिएका छन्।

शुक्रबार गठबन्धन दलहरूले राष्ट्रपति निर्वाचनको सन्दर्भमा बागमती प्रदेशका सांसदहरूलाई केन्द्रित गरेर काठमाडौँमा आयोजना गरिएको अभिमुखीकरण कार्यक्रममा आफूहरूका बीचमा भएको सहमति पाँचै वर्ष कार्यान्वयन भएर अगाडि बढ्ने बताए।

राष्ट्रपतिको निर्वाचनपछि गठबन्धन भत्किने र नेपाली कांग्रेसको नेतृत्वमा सरकार बन्ने भनेर भ्रम फैलाइएको भन्दै त्यस्तो भ्रममा नपर्न उनले आग्रह गरे।

महामन्त्री थापाले आफूहरूका बीचमा भएको सहमति कार्यान्वयन नभएमा दलहरू माथिको इमानदारिता र विश्वसनीयतामा प्रश्न उठ्ने भन्दै त्यसो हुन नदिने अडान लिए। 

उनले नेपाली कांग्रेसका कोही पनि नेताहरूलाई भेटेर गठबन्धन भत्काउने चकचक नगर्न चेतावनी पनि दिए। 

‘अहिले भर्खर म समाचार पढ्दै थिएँ । हामी लोसपाको कार्यालयमा गयौँ, लोसपा हामीलाई मत दिन यो त हाम्रो क्याम्पसको चुनावमा पनि हुँदैनथ्यो । त्यहाँ पनि हामी अलिकति निर्वाचनको मर्यादा राख्थ्यौँ । नेकपा एसको कार्यालयमा आयो, नेकपा एस हामीलाई चुनावमा मतदान दिन सकारात्मक भएको छ, लोसपाको कार्यालयमा गयो लोसपा सकारात्मक भएको छ । यो तहसम्म साथीहरू आएर निर्वाचनको बेलामा यसलाई अल्मल्याउने कोशिस गरिराख्नुभएको छ,' थापाले भने। 

उनले थपे, 'कसैले यसलाई अल्मल्याउन नखोजे पनि हुन्छ । र कोही नअल्मल्लिए पनि हुन्छ । पार्टीका कोही कसैलाई भेटेर फेरि नेपाली कांग्रेससँग चकचक गर्ने काम बन्द गरे हुन्छ यसबाट केही निस्कनेवाला छैन । तेल निस्कनेवाला छैन यो कुरा राम्रो सँग बुझे हुन्छ ।’

महामन्त्री थापाले प्रधानमन्त्री पुष्पकमल दाहाललाई प्रधानमन्त्री बनाइराख्न मात्रै यो गठबन्धन नबनेको स्पष्ट पारे ।

प्रचण्डलाई नेकपा(एमाले)ले पाँचै वर्ष प्रधानमन्त्री दिएको भए पनि त्यसलाई त्यागेर नयाँ गठबन्धन बनाइएको उनको भनाइ छ ।

त्यस्तै नेकपा(एकीकृत समाजवादी)का अध्यक्ष माधवकुमार नेपाललाई पनि एमालेले राष्ट्रपतिको उम्मेदवार अथवा एमालेको अध्यक्ष नै बनाउन पनि तयार हुने स्थिति रहेको उनले बताए। उनले गठबन्धनलाई बचाएर लानुपर्नेमा जोड दिए।