प्रतिनिधिसभामा १९ सिट रहेको राष्ट्रिय स्वतन्त्र पार्टीले सरकारलाई कायम राखेको विश्वासको मतबारे आइतबारको बैठकमा निर्णय लिने भएको छ । 

सोमबार प्रधानमन्त्री पुष्पकमल दाहाल 'प्रचण्ड'ले विश्वासको मत लिने भएपछि आइतबार बैठक बसेर यसबारे निर्णय गर्ने जानकारी उपसभापति डोलप्रसाद अर्यालले जानकारी दिए । 

‘पर्सि प्रधानमन्त्रीले विश्वासको मत लिने भएपछि हामी पनि एउटा टुंगोमा पुग्नुपर्नेछ’ अर्यालले लोकान्तरसँग भने, ‘आइतबार केन्द्रीय समिति र संसदीय दलको संयुक्त बैठक बसेर हामी विश्वासको मतबारे निर्णय लिन्छौं ।’

रास्वपा १० पुसमा प्रचण्ड नेतृत्वको सरकारमा सहभागी भएको थियो । तर सभापति रवि लामिछानेको नागरिकता प्रकरणपछि रास्वपा सरकारबाट बाहिरिएको थियो । तर समर्थन फिर्ता लिएको थिएन ।

राष्ट्रपति निर्वाचनमा धोका भएको भन्दै नेकपा एमाले समर्थन फिर्तासहित सरकारबाट बाहिरिएको थियो।

राप्रपाले पनि मन्त्री फिर्ता बोलाउँदै सरकारलाई दिएको समर्थन फिर्ता लिएको थियो । तर रास्वपाले भने तत्काल सरकारबाट बाहिरिए पनि समर्थन फिर्ता नलिने बताएको थियो। उसले राष्ट्रपतिमा गठबन्धनकाउम्मेदवार रामचन्द्र पौडेललाई मत दिएको थियो । उपराष्ट्रपतिमा भने जनमतकी ममता झालाई मत दिएको थियो ।