सर्लाहीको ईश्वरपुर नगरपालिका १, ३ र ९ का सवा २०० विपन्न परिवारलाई निःशुल्क खानेपानी उपलब्ध गराइएको छ ।

इस्लामिक रिलिफ नेपालको सहयोगमा बागमती सेवा समाज हरिवनले खानेपानीको व्यवस्था गरेको हो । वडा १ को मस्लिम, पोखरीया तक्मा, बैद्यनाथपुर र शंकरगञ्जका ७५, ३ को भक्तिपुर, खड्का र तीनघरे मगरटोलका ७५ र ९ को खुशीपुर, कुरैनियाँ, रामनगर र खोरियाटोलका ७५ विपन्न तथा गरीब घरपरिवारलाई चापाकलमार्फत शुद्ध पिउने पानीको व्यवस्था गरिएको उत्थानशील समुदाय निर्माण परियोजनाका परियोजना प्रमुख चिरञ्जीवी महतोले जानकारी दिए ।

जम्मा १५ वटा चापाकलमार्फत पिउने पानीको व्यवस्था गरिएको हो । नगरका यी ३ वडावासीले प्रयोग गर्दै आएको पिउने पानीमा आर्सेनिक मिसिएको साथै सोही पानी पिउनु पर्दा स्वास्थ्यमा विभिन्न किसिमका समस्या आएको गुनासो आएपछि नगरपालिकाले सिफारिस गरेर सेवा समाजले प्रतिचापाकल करीब ८० हजार रुपैयाँ लगानी गरेर निःशुल्क खानेपानीको व्यवस्था गरेको ईश्वरपुर नगरपालिकाका नगर प्रमुख मनोजकुमार आचार्यले जानकारी दिए ।

अहिले शुद्ध पिउने पानी आउने गरेको र आफूहरूले पहिला गाडेको कल चलाउन छाडेको ईश्वरपुर नगरपालिका–१ का रघुवीर सिंहले बताए । नगरपालिकाले  सिफारिस गरेपछि आफूहरूले सोही क्षेत्रमा काम गरेको इस्लामिक रिलिफ नेपालको उत्थानशील समुदायको निर्माण परियोजनाका परियोजना प्रमुख महतोले बताए ।