सरकार विस्तार गर्न प्रधानमन्त्री पुष्पकमल दाहाल 'प्रचण्ड' निवासमा बुधबार दोस्रो पटकको बैठक शुरू हुन लागेको छ ।

बुधबार बिहान २ घण्टासम्म बसेको बैठकमा मन्त्रालयको भागबन्डामा सहमति नभएपछि पुनः ३ बजे बस्ने भन्दै नेताहरू उठेका थिए । 

प्रधानमन्त्रीका प्रेस संयोजक सूर्यकिरणले बैठक शुरू हुन लागेको जानकारी दिएका हुन् । 

बिहानको बैठकले तत्काल मुख्य दलबाट एक-एक जना मन्त्री बनाएर पहिलो चरणमा मन्त्रीको शपथ गराउने र पछि दोस्रो चरणमा सरकारलाई पूर्णता दिने विषयमा छलफल गरेका थिए ।

बिहानको छलफलपछि प्रधानमन्त्री प्रचण्डले नेकपा एसका अध्यक्ष माधवकुमार नेपालसमक्ष मन्त्रीको नाम दिन आग्रह गरेका थिए । 

लगत्तै नेकपा एसले पहिलो चरणमा सरकारमा प्रकाश ज्वालालाई पठाउने निर्णय गरेको छ । 

पहिलो चरणमा कांग्रेस, नेकपा एस, जसपासहित मन्त्री बनाउने तयारीमा प्रधानमन्त्री रहेका बताइन्छ । गृह मन्त्रालय भने भौतिक पूर्वाधारमन्त्री नारायणकाजी श्रेष्ठले पाउने भएका छन्। 

नेपाली कांग्रेसबाट पूर्णबहादुर खड्का वा डा. प्रकाशशरण महतमध्ये एक जना मन्त्री बन्नेछन् । तर कांग्रेसको तर्फबाट नेतृत्व गरेर उपसभपाति पूर्णबहादुर खड्का जाने सम्भावना अझै टरिसकेको छैन।

कांग्रेसले खड्कालाई पहिलो चरणमा नै पठाउने तयारी गरेको छ । उनले गृह रोजे पनि पाएनन् । अर्थमा पनि कांग्रेस सभापति शेरबहादुर देउवाले महतलाई रोजेपछि खड्काले रक्षा वा परराष्ट्र मन्त्रालय लिनुपर्ने भएको छ । 

सरकारमा कांग्रेसले ७, माओवादीले ४, रास्वपा, नेकपा एस, जसपाले २/२ मन्त्रालय पाउने भएका छन् । यसमा कांग्रेस, माओवादी र रास्वपाले एक एक राज्यमन्त्री थप पाउनेछन् । 

लोसपा, जनमत, नागरिक उन्मुक्ति प्रत्येकबाट १/१ जना मन्त्री बनाउने तयारी छ । स्वतन्त्रमध्येबाट प्रभु साह पनि मन्त्री बन्ने लाइनमा छन् । 

१५ फागुनयता १६ वटा मन्त्रालय प्रधानमन्त्रीसँगै छन् । 

६ चैतमा विश्वासको मत लिएको केही दिनमै सरकार विस्तार गर्ने दाबी प्रधानमन्त्रीले गरेका थिए । तर उनले समयमा भागबन्डा मिलाउन नसक्दा सरकार विस्तारको भाका पटकपटक सर्दै आएको छ ।