को हुन् रवि लामिछानेविरुद्ध उम्मेदवार बनेका कांग्रेसका जीतनारायण श्रेष्ठ ?

कांग्रेसले १० वैशाखमा हुने उपनिर्वाचनका लागि चितवन २ बाट जीतनारायण श्रेष्ठलाई उम्मेदवार बनाउने निर्णय गरेको छ ।

बिहीबार ललितपुरस्थिति केन्द्रीय कार्यालय सानेपामा बसेको केन्द्रीय कार्यसम्पान समितिको बैठकले श्रेष्ठ चितवन २ श्रेष्ठको नाम अघि सारेको हो। 

४ मंसिरको चुनावमा यो क्षेत्रबाट राष्ट्रिय स्वतन्त्र पार्टीका सभापति रवि लामिछाने चुनाव जीतेका थिए । तर नागरिकता प्रकरणमा दोषी ठहर भएपछि सर्वोच्च अदालतले उनको सांसद पद खारेज गरेको थियो । तर पुनः नागरिकता प्राप्त गरेपछि लामिछाने नै फेरि उम्मेदवार बन्दैछन् । 

चितवन २ मा पार्टी गठनको छोटो समयमै रास्वपाका सभापति रवि लामिछानेले फराकिलो जीत हात पारेका थिए । लामिछानेले ४९ हजार ३०० मत ल्याएका थिए । यहाँ कांग्रेसका उमेश श्रेष्ठले १४ हजार ९८८ र एमालेका कृष्णभक्त पोखरेलले १४ हजार ६५२ मत प्राप्त गरेका थिए । राप्रपाका रविन अधिकारीले भने ९५५ मत पाएका थिए । ३४ हजार ३१२ मतान्तरले विजयी भएका थिए । जुन ४ मंसिरमा चुनाव भएका १६५ क्षेत्रमध्ये सबैभन्दा फराकिलो अन्तरको जीत पनि हो । 

अघिल्लोपटक कांग्रेसले उम्मेदवार बनाएका उमेश श्रेष्ठ सभापति शेरबहादुर देउवाका विश्वासपात्र उद्यमी थिए । करोडौं खर्च गर्दा पनि उनले चुनाव जीत्न नसकेपछि यसपटक स्थानीय अनुहारलाई नै कांग्रेसले उम्मेदवार बनाएको हो । उम्मेदवार बनाइएका श्रेष्ठ चितवन कांग्रेसका पूर्वसभापति हुन् । १३ औं महाधिवेशनमा जीतनारायण चितवन जिल्ला सभापति भएका थिए । 

श्रेष्ठ २०४८ सालदेखि कांग्रेसको राजनीति थालेका युवा नेता हुन् । जिल्ला सचिव हुँदै २०७२ माघमा भएको अधिवेशनमा श्रेष्ठ जिल्ला सभापति चुनिएका थिए । सभापति हुँदा उनको उमेर ३८ वर्षमात्र थियो । नेविसंघको जिल्ला सभापति हुँदै उनी पार्टी राजनीतिमा जोडिएका थिए ।  दुईपटक जिल्ला सभापति, जिल्ला सभापति बन्नु अघि २०६८ मा उनी चिवतन कांग्रेसको सचिवमा निर्वाचित भएका थिए । 

श्रेष्ठ कांग्रेसको पूर्वसंस्थापन समूहका नेता हुन् । यसैले उनलाई अहिलेको संस्थापनसहित सबै पक्षको सहयोग नमिले रविसँग प्रतिस्पर्धा गर्न गाह्रो हुने बताइन्छ ।

‘पहिले केन्द्रीय पहुँचमा उमेश श्रेष्ठले टिकट ल्याएर प्रशस्त पैसा खर्च गरे पनि चुनाव जीत्न सकेनन् । फराकिलो मतान्तरले हार बेहोरे’ कांग्रेस चितवनकै एक नेता भन्छन्, ‘अघिल्लोपटकका विरोधले हुन सक्छ । यसपटक स्थानीय उम्मेदवारलाई नै कांग्रेसले उम्मेदवार बनाएको छ । तर पहिलेकै जस्तो अर्को पक्षबाट पनि समर्थन र विश्वास पाउन उम्मेदवारले सबैलाई विश्वासमा लिनुपर्ने हुन्छ ।’ जिल्ला सभापति भइसकेकोले पार्टीको संगठन परिचालनको शैली बुझेका, तल्लो तहसम्म सम्बन्ध र सम्पर्क बनाएको हिसाबले पनि श्रेष्ठलाई थप सहजता हुनेछ । 

नागरिकता प्रकरणपछिको विवाद, सरकारमा प्रवेश, बहिर्गमन, समर्थन, राष्ट्रपति र उपराष्ट्रपतिको निर्वाचनमा फरकफरक भूमिका जस्ता विषयले रास्वपाप्रति पहिलेजस्तो सकारात्मक समर्थन र विश्वास छैन । यसलाई चिरेर अगाडि बढ्नुपर्ने चुनौतीमा रवि छन् । 

विस्तार हुँदै गरेको सरकारमा पनि सहभागी हुने सार्वजनिक इच्छा गरेर पनि रास्वपाले सरकारमा भाग पाएन । यसले पनि रास्वपालाई परम्परागत दल जस्तै सत्ता स्वार्थी दल देखाएको छ । रविले निर्वाचनमा फेरि जाँदा यो विषयलाई चिर्नुपर्नेछ । तर विपक्षीका लागि रविको यही पाटो चुनावी मुद्दा बन्ने देखिन्छ । 

कांग्रेस र रास्वपाबाट उम्मेदवार तय भए पनि एमालेले कसलाई उम्मेदवार बनाउने भन्ने निर्णय गरिसकेको छैन । 

उम्मेदवार भएपछि के भने श्रेष्ठले ? 

कांग्रेसबाट चितवन २ को उम्मेदवार बनेका जीतनारायण श्रेष्ठले ४ मंसिरमा रवि लामिछानेले हावाहुरीको सिर्जना गरे पनि अहिले उनी पहिचान खोज्नुपर्ने अवस्थामा पुगेको टिप्पणी गरेका छन् । केन्द्रीय कार्यालयमा आफ्नो नाममा सहमति बनेपछि सञ्चारकर्मीसँग कुराकानी गर्दै श्रेष्ठले अब पहिले जस्तो चिवतनमा रविको हावाहुरीको असर नहुने बताए। 

‘चितवनमा मंसिरमा भएको निर्वाचनमा हावाहुरी आएको थियो । तर जे जसरी त्यहाँ हावाहुरी आएको थियो अहिले जनताको बीचमा स्थिति त्यसतो छैन । रवि लामिछाने मेरो पहिचान कहाँ हो भनेर खोज्नुपर्ने अवस्थामा पुगेका छन्’ श्रेष्ठले भने, ‘रास्वपाले कहिले कसलाई समर्थन गर्ने, कहिले कसलाई भोट हाल्ने र किन भोट हालको भभनेर पनि खुलाएको छैन । किन सरकारलाई समर्थन गरेको र विश्वासको मत किन दिएको भनेर पनि जनतालाई भन्नु नपर्ने ? न पार्टीबाट निर्णय गर्नुपर्ने । यसपटक चितवनका नागरिक सचेत भइसके ।’

जनताले नजिकबाट लामिछानेको गतिविधिको निगरानी गरेको भन्दै १० वैशाखको निर्वाचनमा परिणाम उल्टाउने दाबी पनि उनले गरे ।