सुदूरपश्चिम प्रदेशमा कोरोना विरुद्धको बुस्टर डोज लगाउने संख्या न्यून रहेको छ ।

प्रदेशमा कोरोना विरुद्धको खोपको पूर्ण मात्रा लगाउनेभन्दा बुस्टर डोज लगाउनेको संख्या आधा कम हो । 

प्रदेशका ९ वटै जिल्लामा गरी हालसम्म कूल २२ लाख ३३ हजार ८३१ जनाले कोरोना विरुद्धको खोपको पूर्ण मात्रा लगाएका छन् । तेस्रो तथा बुस्टर डोजको पहिलो मात्रा लगाउने संख्या १० लाख १५ हजार ३७ रहेको सुदूरपश्चिम प्रदेश स्वास्थ्य निर्देशनालयका कोभिड–१९ सम्पर्क व्यक्ति हेमराज जोशीले जानकारी दिए ।

कैलालीमा ७ लाख ३२ हजार ७८९ जनाले पूर्ण मात्रा लगाएकोमा ३ लाख ८६ हजार १८८ जनाले मात्रै बुस्टर डोज लगाएका छन् । कञ्चनपुरमा ४ लाख ३९ हजार १६८ जनाले पूर्ण र १ लाख ९९ हजार ८५७ जनाले बुस्टर डोज लगाएको निर्देशनालयले जनाएका छन् । 

बैतडीमा २ लाख ११ हजार ६५२ जनाले पूर्ण तथा ९८ हजार २१३ जनाले बुस्टर डोज, अछाममा १ लाख ८३ हजार ६०२ जनाले पूर्ण तथा ८८ हजार ८५२ जनाले बुस्टर डोज, डोटीमा १ लाख ६१ हजार १३८ जनाले पूर्ण तथा ६३ हजार ५१४ जनाले बुस्टर डोज, बझाङमा १ लाख ३७ हजार ६११ पूर्ण तथा ३२ हजार ११७ जनाले बुस्टर डोज, डडेल्धुरामा १ लाख २७ हजार ७२५ जनाले पूर्ण तथा ६७ हजार ५८४ बुस्टर डोज, बाजुरामा १ लाख २५ हजार ४६८ जनाले पूर्ण तथा २९ हजार ८०९ जनाले बुस्टर डोज तथा दार्चुलामा १ लाख १४ हजार ६२८ जनाले पूर्ण तथा ४८ हजार ९०३ जनाले बुस्टर डोज लगाएका छन् । 

प्रदेशभरि कोरोना भाइरसविरुद्धको चौथो तथा बुस्टर डोजको दोस्रो मात्रा लगाउनेको संख्या भने २९ हजार ८५६ मात्रै रहेको निर्देशनालयको तथ्यांकमा उल्लेख छ । रोग फैलिएपछि मात्रै खोप लगाउनुपर्छ भन्ने सोचका कारण बुस्टर डोज लगाउनेको संख्या न्यून भएको सुदूरपश्चिम प्रदेश स्वास्थ्य निर्देशनालयका जनस्वास्थ्य निरीक्षक मीनराज जोशीले बताए ।

उनले भने, ‘रोग फैलिएपछि मात्रै खोप लगाउनुपर्छ भन्ने सोच अझै छ ।’