च्याम्पियन्स लिगमा गएराति इंग्लिस प्रिमियर लिगको बलियो टोली म्यानचेस्टर सिटीले जर्मन लिगको अर्को सशक्त टिम बायर्न म्युनिखलाई हराएको छ। 

उक्त खेलमा सिटीका नर्वेली युवा फरवार्ड इर्लिङ हाल्याण्डले प्रिमियर लिग खेल्ने खेलाडीमध्ये एकै सिजन धेरै गोल गर्ने कीर्तिमान पनि बनाउन सफल भए। 

घरेलु मैदानमा जित निकाल्ने क्रममा सिटीका लागि रोड्रीले २७ औं मिनेटमा पहिलो गोल गरे। पहिलो हाफमा १-० को अग्रता लिएको सिटीले दोस्रो हाफमा थप २ गोल गर्न सफल भयो। बर्नाण्डो सिल्भाले ७० तथा हाल्याण्डले ७६ औं मिनेटमा गोल गरेपछि सिटी च्याम्पियन्स लिगको क्वार्टरफाइनलको पहिलो लिग ३-० ले आफ्नो पक्षमा पार्न सफल भयो। 

२२ वर्षीय हाल्याण्डले एकै सिजन ३९ खेलमा ४५ गोल गरेर कीर्तिमान बनाएका हुन् । यसअघि लिभरपुलका मोहम्मद सलाहले र म्यानचेस्टर युनाइटेडका रुड भान निस्टलरोएले एकै सिजनमा ४४ गोल गरेका थिए। तर हल्याण्डले ३९ खेलमै ४५ गोल गरेर यो कीर्तिमान आफ्नो नाममा लेखाएका छन्। 

त्यस्तै गएराति नै भएको अर्को क्वार्टरफाइनलमा पोर्चुगलको बेन्फिकालाई इटालीको क्लब इन्टर मिलानले २-० गोलअन्तरले पराजित गर्न सफल भयो। बेन्फिकाको मैदानमा जीत निकाल्ने क्रममा इन्टर मिलानका निकोलो बरेला र रोमेलु लुकाकुले गोल गरे।