बालकृष्ण खाँण सरकारी वकिलको कार्यालयमा, म्याद थपका लागि अदालत लैजाने तयारी

नक्कली शरणार्थी प्रकरणमा पक्राउ परेका पूर्व गृहमन्त्री बालकृष्ण खाँणलाई सरकारी वकिलको कार्यालयमा पुर्‍याइएको छ ।

खाँणलाई म्याद थपका लागि जिल्ला अदालत काठमाडौं लैजानुअघि खाँणलाई बबरमहलस्थित जिल्ला सरकारी वकिलको कार्यालयमा पुर्‍याइएको हो ।

कम्तीमा थप ३ दिनका लागि हिरासतमा राख्न अनुमति माग्ने तयारी छ । सरकारी वकिलको कार्यालयबाट उनलाई सिधै जिल्ला अदालत लगिने छ ।

शुरूमा ३ दिनका लागि पाएको म्याद शुक्रवार सकिएको थियो । शनिवार बिदा भएकाले आज मात्रै म्याद थपका लागि लैजान लागिएको हो ।

खाँण बुधवार चाबहिल मैजुबहालस्थित निवासबाटै पक्राउ परेका थिए ।

नेपाली नागरिकलाई भुटानी शरणार्थी बनाएर अमेरिका पठाउने धन्दामा स‌ंलग्न भएको आरोपमा उनलाई पक्राउ गरिएको हो ।

खाँणले स्वकीय सचिव नरेन्द्र केसीमार्फत तथा मनी ट्रान्सफरमार्फत रकम बुझेको प्रमाण भेटिएको प्रहरीले जनाएको छ ।

यसप्रकरणमा खाँणसहित १२ जना पक्राउ परी प्रहरी हिरासतमा छन् ।