नेकपा (एकीकृत समाजवादी)का अध्यक्ष माधव नेपालले बनिसकेको सरकार फुत्किनुमा एमाले अध्यक्ष केपी ओलीको व्यक्तिवादको रोग कारण रहेको आरोप लगाएका छन् । सोमवार बसेको प्रतिनिधि सभा बैठकमा सरकारका नीति तथा कार्यक्रममाथिको छलफलमा भाग लिँदै नेता नेपालले व्यक्तिवादको रोगबाट मुक्त हुन नसक्दा राजनीतिले सही दिशा लिन नसकेको बताएका हुन् ।

आफूलाई सर्वज्ञानी ठान्ने प्रवृत्ति अहिले राजनीतिको समस्या भएको उनको भनाइ थियो । 

आइतवार सरकारका नीति तथा कार्यक्रम माथिको छलफलमा एमाले अध्यक्ष ओलीले आफ्नो सरकार हटेपछि देश समस्यामा फसेको बताएका थिए । 

‘सरकारमा बस्न किन सकिएन ? बनिसकेको सरकार किन फुत्कियो ? अहिले सत्तो सराप गरेर हुँदैन । आफू भित्रको कमी कमजोरी पहिचान गरेर सुधार गरौं । हामीकहाँ सबभन्दा ठूलो समस्या व्यक्तिवादको रोग हो, आफूलाई सर्वज्ञानी ठान्ने प्रवृत्ति र अरुलाई अवमूल्यन गर्ने प्रवृत्ति’ नेपालले भने । 

व्यक्तिवादको रोगबाट मुक्त हुन सकिएन भने सरकारमा बसेर पनि केही काम गर्न नसकिने बताए । ‘सरकारमा बस्दा हावादारी कुरा गरेर हुँदैन । पानीजहाज र विद्युतीय रेलको टिकट काट्न भनिएको थियो खोइ त ? घर घरमा ग्यास पाइपलाइन भनिएको थियो, खोई ग्यास ?’ नेपालले प्रश्न गरे । पूर्वप्रधानमन्त्री नेपालले सरकारका नीति तथा कार्यक्रम देशका समस्या समाधान गर्न सक्षम रहेको दाबी गरे ।

पुस १० गते माओवादी केन्द्रका अध्यक्ष प्रचण्ड नेतृत्वमा एमालेसहितको गठबन्धन सरकार बनेको थियो । तर, एमालेसहितको गठबन्धनमा खटपट हुँदा अहिले कांग्रेसहितको गठबनधन सरकार बनेको छ । गठबन्धन फेरिए पनि सरकारको नेतृत्व भने फेरिएको छैन ।