पूर्वराजालाई सांसद्को चेतावनी – तेस्रोचोटी राजा हुने प्रयत्न नगर्नुस्

नेकपा एमालेका सांसद रघुजी पन्तले तेस्रोपटक राजा हुने प्रयत्न नगर्न पूर्वराजा ज्ञानेन्द्र शाहलाई चेतावनी दिएका छन् ।

मंगलवार संघीय संसद् भवन नयाँ बानेश्वरमा सञ्चारकर्मीसँग कुराकानी गर्दै सांसद पन्तले पूर्वराजा ज्ञानेन्द्र शाहलाई तेस्रोपटक राजा हुने प्रयत्न नगर्न चेतावनी दिए ।

एउटा प्रक्रियाबाट राजतन्त्र नेपालबाट बिदा भइसकेको भन्दै राजतन्त्रको बिदाइ नेपाली जनताको चाहना भएको उनले बताए । उनले राजाले शान्तिपूर्ण रूपले गद्दी छाडेको र दलहरूले पनि कुनै बदला नलिएको अवस्था रहेको भन्दै शाहलाई देशले पूर्व राष्ट्राध्यक्षको रूपमा सम्मान र सुरक्षा दिएको उल्लेख गरे । उनले राज्यले दिएको सम्मानको पूर्वराजाले कदर गर्नुपर्ने बताए ।

उनले भने, ‘ज्ञानेन्द्र दुईचोटी राजा हुनुभयो । तेस्रोचोटी राजा हुने प्रयत्न नगर्नुस् । २ चोटी राजा हुनुभयो पुग्यो, तेस्रोचोटी राजा हुने प्रयत्न नगर्नुस् । किनभने एउटा प्रक्रियाबाट राजतन्त्र बिदा गरिएको हो । नेपाली जनताको चाहना अनुसार । अन्त धेरै ठाउँमा क्रान्ति भएको ठाउँमा राजतन्त्र समूल पारेका छन् । नेपालमा समझदारीले राम्रो के भयो भनेदेखि राजाले पनि जनताको भावना बुझेर शान्तिपूर्ण ढंगले गद्दी छोडे र त्यो गद्दी छोडिसकेपछि कुनै बदलाको कारबाही पनि बहुदलवादीहरूले राजालाई गरेनन् । राजा भूतपूर्व राष्ट्राध्यक्षको रूपमा शान्तिपूर्ण ढंगले उहाँको कुनै सम्पत्ति पनि खोसिएको छैन । उहाँले कसरी कमाउनुभएको छ भनेर खोजीनीति पनि गरिएको छैन । ती सबै कुरालाई शान्तिपूर्ण ढंगले समाधान गरियो र राजालाई पूर्व राष्ट्राध्यक्षको रूपमा देशले सम्मान, सुरक्षा दिएको छ । त्यसको राजाले कदर गर्नुपर्‍यो । राजीतिक लक्ष्य त्याग्नुपर्‍यो । राजनीति गर्न मन लाग्छ भने संविधानले त रोकेको छैन । खोल्नुस् पार्टी । चुनाव लडेर आउनुहुन्छ भने भैहाल्यो ।’

नेकपा माओवादी केन्द्रका सांसद माधव सापकोटाले पूर्वराजा शाहको सक्रियताबाट तर्सिनु नपर्ने बताए । दलहरूको बीचमा विवाद भएकै कारण राजतन्त्र नफर्किने उनले स्पष्ट पारे । गणतन्त्रात्मक व्यवस्था फेल नभएको भन्दै उनले राजतन्त्र नफर्किने बताए ।

उनले भने, ‘किन तर्सिनु ? तर्सिनै पर्दैन । हामीहरू अहिले पार्टीहरूका बीचमा विवाद गर्‍यौं, बहस गर्‍यौं, झमेला गर्‍यौं भनेर यो व्यवस्था नै फेल भयो भन्न मिल्छ ? हामीले लोकतन्त्र ल्याउने, गणतन्त्र भनेका हौं । वादविवादको बीचबाट एउटा संवाद निकालेर जान्छौं भनेको हो । गन्थनमन्थन गर्दैछौं । आखिरी पर्दाखेरी हिजो संविधान बनाउने बेलामा पनि सबै अग्रगामी शक्तिहरू एक ठाउँमा आएर देशलाई निकास दियौं । अहिले समृद्धिको यात्रामा पनि फेरि सबै दलहरू एकै ठाउँमा आउनुको विकल्प छैन । हाम्रो कार्यशैली, सोच्ने शैलीमा हामीले पुनरावलोकन गर्नुपर्छ । पुनर्विचार गर्नुपर्छ तर यो व्यवस्था फेल भएको छैन ।’

नेपाली कांग्रेसका सांसद रामहरि खतिवडाले पूर्वराजाले नेपाली नागरिकका रूपमा हिँड्दा आफूहरूलाई कुनै चिन्ता नभएको बताए । उनले नेपालको कानून, संविधानको दायराभित्र रहेर कोही कहीँ घुम्दैमा लोकतन्त्र समाप्त नहुने टिप्पणी गरे ।

उनले भने, ‘राजा नेपाली नागरिक भएर हिँड्दा हामीलाई केही चिन्ता छैन । कसैले तर्साएर तर्सिंदैनौं । कसैले तर्साउँदैमा लोकतन्त्र त्यति कमजोर छैन एउटा नागरिक हिँड्दै आफ्नो कुरा राख्दै जाँदाखेरी सबै तर्सेर भाग्नुपर्ने अवस्था छैन । नेपाली जनताले चाह्यो भने कसैलाई स्थापना गर्न, पुनःस्थापना गर्न, हटाउन सक्छ । सभ्य, शालिन रूपमा प्रस्तुत हुँदा हाम्रो कसैसँग विमति रहँदैन । नेपालको कानून, संविधानको दायराभित्र रहेर कोही काहीँ घुम्दैमा लोकतन्त्र समाप्त हुँदैन । कानूनी राज्य समाप्त हुँदैन । त्यही आधारमा राजा आइहाल्छ भन्ने पक्षमा म छैन ।’

राष्ट्रिय स्वतन्त्र पार्टीका सांसद मनिष झाले राजनीतिक उपलब्धिहरूलाई संस्थागत गर्न नसक्दा र दलहरूमा कमजोरी रहेसम्म केही तत्वहरू सल्बलाइरहने टिप्पणी गरे । उनले पूर्वराजाको सक्रियतालाई स्वाभाविक रुपमा लिनुपर्ने बताए ।

उनले भने, ‘हाम्रो कमजोरी छ, राजनीतिक संस्कारमा कि उपलब्धिहरूलाई संस्थागत गर्न सकिराखेका छैनौं हामीले । त्यो कमजोरी रहेसम्म सल्बराइरहने तत्वहरू रहिरहन्छन् । त्यसैले गर्दा यसलाई स्वाभाविक रूपमा लिनुपर्छ र उनीहरू बलियो भएको होइन कि राजनीतिक दलले गर्नुपर्ने संस्थागत अभ्यासहरू कमजोर भएको हो ।’

उनले वर्तमान प्रणालीप्रति कुनै किसिमको जोखिम नरहेको बताए ।