बालकृष्ण पन्थी नेतृत्वको कार्यदलले दिएको प्रतिवेदन २ वटा फरक–फरक व्यहोरा र प्रकृतिको विषयमा  नक्कली भुटानी शरणार्थी प्रकरणको छानबिनका क्रममा गृह मन्त्रालयका सहसचिव फणिन्द्रमणि पोखरेलले प्रहरीसमक्ष बयान कागज गरेका छन् । 

तत्कालीन गृह सचिव टेकनारायण पाण्डेको अस्वाभाविक चासो देखिएको भन्दै उनले कागज गरेका छन् ।

‘पन्थीको संयोजकत्वमा गठित कार्यदलले दिएको प्रतिवेदन २०७८ मंसिर १२ गते मन्त्रिपरिषद्मा पेश भई गृह मन्त्रालयमा फिर्ता आएपछि कहिले, कसरी फेरियो वा नक्कली प्रतिवेदन कहिले, कसरी, कसले तयार गर्‍यो भन्ने यकिन साथ भन्न सक्दिनँ,’ पोखरेलले गरिदिएको कागजमा उल्लेख छ, ‘तर सो प्रतिवेदनका सम्बन्धमा टेकनारायण पाण्डेको अस्वाभाविक चासो  रहेको, मन्त्रिपरिषद्मा पेश भई फिर्ता आएको प्रतिवेदन बारम्बार शाखाबाट माग गरी लामो समयसम्म राख्ने समेत गरेका कारण निजकै निर्देशन वा संलग्नता समेतबाट प्रतिवेदन फेरबदल भएको तथा नक्कली प्रतिवेदन मन्त्रालयको स्थानीय प्रशासन तथा प्रदेश समन्वय शाखामा राखेको हुनसक्छ ।’ 

प्रतिवेदन हेरफेरमा आफ्नो कुनै पनि संलग्नता नरहेको तथा पहिचान गरिएका ४२९ समेत अन्य थप नाम समावेश गराउने विषयमा आफूले शुरूदेखि नै विपक्षमा मत राख्दै आएको उनले बयान गरेका छन् ।

पोखरेल यसअघि लामो समयसम्म गृह मन्त्रालयको प्रवक्ताको जिम्मेवारीमा थिए । हाल उनी कसूरजन्य सम्पत्ति व्यवस्थापन विभागमा कार्यरत छन् । २०७८ साउन १ गतेदेखि २०७९ माघसम्म उनले गृह मन्त्रालयको शान्ति सुरक्षा महाशाखा प्रमुख भएर काम गरेका थिए ।