चीनमै बनेको पहिलो यात्रुवाहक विमानले पहिलो व्यापारिक उडान गरेको छ । 

सरकारी सञ्चारमाध्यममा सी९१९ नामक विमान आइतवार शाङ्हाईको आकाशमा उडेको अनि बेइजिङतर्फ लागेको देखाइएको थियो । 

यस विमानलाई कमर्सियल एभिएशन कर्पोरेशन अफ चाइना (कोमाक) ले बनाएको हो । फ्रान्सको एयरबस तथा अमेरिकाको बोइङ कम्पनीले विमान निर्माणमा कायम गरेको प्रभुत्व तोड्ने लक्ष्य चीनले लिएको छ । 

यो १६४ सीट भएको विमान चीनमै बनाइएको भए पनि यसको इन्जिन र एभियोनिक्स पश्चिममा बनेको हो । 

विमानले १३० यात्रुलाई शाङ्हाईबाट बेइजिङ पुर्‍याएको थियो । यात्रा तीन घन्टाभन्दा कम समयमा पूरा भएको थियो । 

सरकारको समर्थन रहेको चाइना ईस्टर्न एयरलाइनले यस्ता पाँचवटा विमानको माग गरेको छ । 

कोमाकले पाँच वर्षको अवधिमा वार्षिक रूपमा १५० वटा विमान निर्माण गर्न चाहेको छ । सी९१९ कमा लागि १२ सयभन्दा बढी अर्डर पाइसकेको कोमाकले जनाएको छ ।