आर्थिक वर्ष २०७९/८० मा लागूपदार्थ सेवन गरी सवारीसाधन चलाउने १४९ जना चालकलाई ट्राफिक प्रहरीले नियन्त्रणमा लिएको छ । 

काठमाडौं उपत्यकाका विभिन्न स्थानमा ट्राफिक प्रहरीले गरेको चेकिङको क्रममा लागूपदार्थ सेवन गरी सवारीसाधन चलाउँदै गरेका चालकहरूलाई नियन्त्रणमा लिएर आवश्यक कारबाहीको लागि सम्बन्धित प्रहरी वृत्तहरूमा पठाएको छ ।

नेपाल प्रहरी अस्पतालको प्राविधिक सहयोगमा काठमाडौं उपत्यका ट्राफिक प्रहरी कार्यालय, लागूऔषध नियन्त्रण ब्युरो र सम्बन्धित प्रहरी कार्यालयहरूको संयुक्त टोलीले काठमाडौं उपत्यकाका विभिन्न स्थानमा चालकलाई चेकजाँच गर्दै आएको छ । 

चालकहरूले लागूऔषध सेवन गरी सवारीसाधन चलाए/नचलाएको सम्बन्धमा टीएचसी किटको प्रयोग गरी २०७९ साउन ९ गतेबाट ट्राफिक प्रहरीले चेकजाँच अभियान शुरू गरेको थियो ।

शुक्रवार भक्तपुरको जगातीमा गरिएको चेकिङका क्रममा लागूपदार्थ सेवन गरी मधेश प्रदेश–०३–००१ ज ०३ ०३ नम्बरको भाडाको विङ्गर चलाएका सर्लाहीको लालबन्दीका ३२ वर्षीय राजिव कार्कीलाई ट्राफिक प्रहरीले नियन्त्रणमा लिएको छ । नियन्त्रणमा आएका उनलाई आवश्यक अनुसन्धान तथा कारबाहीका लागी प्रहरी वृत्त जगातीमा राखिएको छ । 

लापसे गरी सवारीसाधन चलाउने चालकमध्ये भाडाका सवारीसाधन चलाउने चालक पनि रहेकाले यात्रु बोक्ने जस्तो संवेदनशील सवारीसाधन चलाउने चालकले नै लागूपदार्थ सेवन गरी सवारीसाधन चलाउनु निन्दनीय कार्य भएको काठमाडौं उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरीक्षक राजेन्द्रप्रसाद भट्टले बताए । यसरी सवारीसाधन चलाउँदा चालकको मात्र नभई यात्रुहरूको जीवन समेत जोखिममा पर्ने भएकाले आफू सवार सवारीसाधनका चालकले लागूपदार्थ तथा मादक पदार्थ सेवन गरेको शंका लागेमा यात्रुले तत्काल नजिकैको प्रहरी कार्यालय, ट्राफिक कन्ट्रोल रूमको हटलाइन नम्बर १०३ र प्रहरीको हटलाइन नम्बर १०० मा  खबर गर्न अनुरोध गरिएको छ ।