नेकपा एकीकृत समाजवादीको केन्द्रीय सचिवालय बैठक आज मंगलवार पनि बस्दैछ ।

गत शुक्रवारदेखि पुष्पलाल स्मृति प्रतिष्ठानमा जारी बैठकमा समावेश गरिएका कार्यसूचीमा छलफल नसकिएकाले आज मंगलवार पुनः बैठक बस्न लागेको हो ।

संगठन सुदृढीकरण अभियानको समीक्षा, वैचारिक नीति, कामको विस्तृत योजनाका साथै पार्टी परित्याग गरी गएका केही नेताको पद रिक्त रहेकाले ती पदमा मनोनित गर्ने भन्ने विषयमा बैठकमा छलफल गरिने उपमहासचिव डा. विजय पौडेलले जानकारी दिए ।

बैठकमा वरिष्ठ नेता झलनाथ खनाल, महासचिव घनश्याम भुसाल, उपमहासचिव डा. गंगालाल तुलाधर, उपमहासचिव डा. पौडेल लगायत नेताले पार्टीको वैचारिक नीति र संगठन सुदृढीकरणमा धारणा राखिसकेका छन् ।

पार्टीमा केही उपाध्यक्ष सहितका पदाधिकारी तथा बागमती र लुम्बिनी प्रदेशमा इन्चार्ज पद रिक्त छन् । बैठकमा जनसंगठन युवा र विद्यार्थी विभागका काम व्यवस्थापनका लागि कार्ययोजना पारित गरिने छ ।