कोशीमा सभामुखलाई राजीनामा गराएर मुख्यमन्त्रीमा दाबी पेश गर्ने गठबन्धनको तयारी

राष्ट्रिय प्रजातन्त्र पार्टीले नसघाउने भएपछि सत्ता गठबन्धनले कोशी प्रदेशका सभामुख बाबुराम गौतमको राजीनामा गराउने भएका छन् । सभामुखले राजीनामा दिने सहमति भइसकेको कांग्रेसका प्रमुख सचेतक भुपेन्द्र राइले बताए ।

गठबन्धनले सभामुख गौतमलाई राजीनामा गराएर संविधानको धारा १६८ को उपधारा २ अनुसारको सरकारको दाबी गर्ने भएको हो ।

अहिलेसम्म सरकारको नेतृत्व कसले गर्ने भन्ने विषयमा टुंगो नलागे पनि सभामुखले राजीनामा दिने विषयमा सहमति भइसकेको प्रमुख सचेतक राईले बताए । 

दाबी पेश गर्न प्रदेश प्रमुख परशुराम खापुङले दिएको  समय सीमा आज साँझ ५ बजे सकिँदै छ । कांग्रेसकै नेतृत्वका सरकार बन्ने गरी छलफल भइरहेको उनले बताए । 

सर्वाेच्च अदालतले गत ११ गते संवैधानिक प्रक्रिया अनुसार गठन नभएको भन्दै नेपाली कांग्रेस संसदीय दलका नेता उद्धव थापा नेतृत्वको सरकारलाई २२ दिनमै बर्खास्त गरिदिएको थियो । थापा नेतृत्वको सरकार गत असार २१ गते गठन भएको थियो ।