नेपाली कांग्रेस संसदीय दलका नेता उद्धव थापालाई मुख्यमन्त्री बनाउन कोशी प्रदेशको सभामुखबाट राजीनामा दिएका बाबुराम गौतम मन्त्री बन्ने भएका छन् ।

कोशी प्रदेशका नवनियुक्त मुख्यमन्त्री उद्धव थापाले आज बुधवार नै मन्त्रिमण्डल विस्तार गर्दैछन् । ३ पार्टीबाट ३ जनालाई मन्त्री बनाउने तयारी छ ।

माओवादीले आज बुधवार नै गौतमलाई मन्त्रीमा सिफारिस गर्ने भएको हो । ‘पहिलो चरणमै उहाँलाई मन्त्री बनाउँदैछौं,’ माओवादी केन्द्र संसदीय दलका नेता इन्द्रबहादुर आङ्बोले भने, ‘मन्त्रालयको टुंगो लागेको छैन ।’

नेपाली कांग्रेसबाट प्रदीप सुनुवार र एकीकृत समाजवादीले कमल जवेगुलाई मन्त्री बनाउने तयारीमा सत्ता गठबन्धन रहेको स्रोतको दाबी छ । प्रदीप जवेगु यसअघि पनि मन्त्री भएका थिए । 

पहिलो चरणमा गठबन्धन दलबाट १–१ जनालाई मन्त्री बनाउने सहमति भएको कांग्रेसका प्रमुख सचेतक भूपेन्द्र राईले बताए । राईका अनुसार बुधवार जसपाकी निर्मला लिम्बु मन्त्री नबन्ने भएकी छन् । 

नेपाली कांग्रेस कोशी प्रदेश संसदीय दलका नेता उद्धव थापा २६ दिनभित्र दोस्रोपटक मुख्यमन्त्री नियुक्त भएका छन् । यसअघि असार २१ गते पहिलोपटक कोशी प्रदेशको मुख्यमन्त्री नियुक्त भएका थापालाई सर्वोच्च अदालतले साउन ११ गते बिहीवार पदमुक्त गरेको थियो ।

मुख्यमन्त्री दाबी गर्दा प्रदेशसभा सभामुखको समेत हस्ताक्षर संलग्न गराएको विषयलाई सर्वोच्च अदालतले असंवैधानिक ठहर गर्दै उनको नियुक्ति बदर गरेको थियो । बाबुराम गौतमले सभामुख पदबाट राजीनामा दिएर थापालाई मुख्यमन्त्री बनाउन सहज बनाइदिएका छन् ।

प्रधानमन्त्री पुष्पकमल दाहाल ‘प्रचण्ड’का ज्वाइँ समेत रहेका प्रदेशसभा सदस्य जीवन आचार्यलाई पटक–पटक मन्त्री बनाउन नहुने मत माओवादीभित्र बलियो भएपछि पहिलो चरणमा भने उनी मन्त्री नबन्ने भएका छन् । 

नेकपा माओवादी केन्द्रका तर्फबाट ओखलढुंगाबाट निर्वाचित गौतम दोस्रो प्रदेशसभा सभामुखमा पुस २८ गते निर्विरोध निर्वाचित भएका थिए । उनको हस्ताक्षरकै कारण अदालतले मुख्यमन्त्री थापालाई बर्खास्त गरेको थियो । सभामुखलाई हस्ताक्षर गराएर मुख्यमन्त्री बनेका उद्धव थापा २२ दिनमै पदमुक्त भएका थिए ।