यस्तो रह्यो नारायण रायमाझीको एकल साँझ

अग्रज संगीतकार तथा गायक नारायण रायमाझी जीवनकै पहिलो पटक एकल साँझमा पेस भएका छन् ।

राष्ट्रिय लोक तथा दोहोरीगीत प्रतिष्ठानले शुक्रबार आयोजना गरेको ‘नारायण रायमाझी साङ्गीतिक साँझ २०८०’मा उनले आफ्नो कालजयी गीतबाट दर्शकलाई मोहित बनाए । 

नेपाल प्रज्ञा प्रतिष्ठान कमलादीमा आयोजित कार्यक्रममा संस्कृति, पर्यटन तथा नागरिक उडड्यनमन्त्री सुदन किराँती, नेपाल सरकारका उच्चपदस्थ पदाधिकारी, गीतसंगीत क्षेत्रका अग्रज एवं नयाँ पुस्ताका कलाकारदेखि सर्वसाधारणको बाक्लो उपस्थिति रहेको थियो । 

कार्यक्रममा रायमाझीले राम्दी पुल तर्ने बित्तिकै, नमुछे आमा दहीमा टीका, हाँसेर बोलीदेऊ माया, सान्नानीले झुक्यायो मलाई, उनको प्रीति लगायतका गीत प्रस्तुत गरेका छन् ।

उनलाई शर्मिला गुरुङ, लक्ष्मी न्यौपाने, कुलेन्द्र विश्वकर्मा, राधिका हमाल, राजु गुरुङ, कृष्ण रेउले, टीका पुन, विक्रम परियार, कुशल बेलबासे, चेतन गोतामे, कमला पोखरेल, दीपिका बयम्भु, प्रकाश दूतराज, रचना रिमाल, सुप्रिम मल्ल, पूजा देवकोटा लगायतले साथ दिएका थिए । 

रायमाझी निर्देशित आगामी कात्तिक ३ गते प्रदर्शन हुने ‘परदेशी २’को कथा बोल्ने गीति नाटक समेत गरिएको कार्यक्रममा प्रस्तुत गरिएको थियो । 

कार्यक्रमको उद्घाटन गर्दै मन्त्री किरातीले लोक गीतका क्षेत्रमा नारायण रायमाझीको नाम उचो रहेको भन्दै उनी सल्लाहकार रहेको संस्था लोक तथा दोहोरी लोकदोहोरी प्रतिष्ठानलाई सहयोग गर्ने घोषणा गरेका थिए । आफ्नो बुवाको पेन्सनवापत प्राप्त दुई महिनाको रकम प्रतिष्ठानलाई सहयोग गर्ने घोषणा मन्त्री किराँतीले गरे । 

पाल्पाको झडेवामा जन्मिएका रायमाझीका ‘गार्खा पल्टन’ र ‘परदेशी’ फिल्म यस अगाडि सफल भइसकेका छन् । 

कार्यक्रममा प्रतिष्ठानका संस्थापक अध्यक्ष अम्मर बिरही गुरुङ, पूर्व अध्यक्षहरु प्रजापति पराजुली, दुर्गा रायमाझी, पुरुषोत्तम न्यौपाने, चन्द्र शर्मा, बद्री पंगेनी, रमेश बिजी, एमाले नेता प्रदीप ज्ञवाली, निर्देशक तथा फिल्म अभिनेता नीर शाह, गायक बमबहादुर कार्की, गीतकार कृष्णहरि बराल, कलाकारहरू मदनदास श्रेष्ठ, सन्तोष पन्त, केकी अधिकारी लगायतको समेत उपस्थिति थियो । ​

रमेश बिजी, पुरुषोत्तम न्यौपाने, दुर्गा रायमाझी, प्रकाश सपुत लगायतका कलाकारले सहजीकरण गरेका कार्यक्रमको सभापतित्व प्रतिष्ठानकी अध्यक्ष रीता थापा मगरले गरेकी थिइन् । नेपाल टेलिकमको मुख्य प्रायोजनमा एकल साँझ भएको हो ।