सुनसरी जिल्ला अदालतले सिद्धबाबालाई दियो दोस्रो पटक सफाइ

आफ्नै अनुयायीमाथि बलात्कार गरेको आरोप लागेका सुनसरी चतराधामका सिद्धबाबा भनिने कृष्णबहादुर गिरीलाई सुनसरी जिल्ला अदालतले सफाइ दिएको छ ।

अदालतका न्यायाधीश हरिप्रसाद कोइरालाको इजलासले बुधबार मागदाबी नपुग्ने भन्दै आरोपितले कसुरबाट सफाइ पाउने फैसला गरेको हो ।

यसअघि पनि जिल्ला अदालतको यसअघिको फैसला पुनःविचार गर्न भन्दै उच्च अदालत, विराटनगरले जिल्लामा मुद्दा फर्काएको थियो । 

सिद्धबाबाविरुद्ध जिल्ला अदालतमा परेको जबरजस्ती करणी मुद्दामा निवेदकको माग नपुग्ने अन्तिम फैसला भएको अदालतका तहसिलदार भरतमणि पोखरेलले बताए । उनले दोस्रो पटक अदालतबाट सफाइ पाएका हुन् । 

जिल्ला अदालतका न्यायाधीश अर्जुन कोइरालाको इजलाशले सिद्धबाबालाई २०७७ मंसिरमा सफाइ दिएको थियो । सो मुद्दालाई उच्चले जिल्लामा फर्काएपछि २०७९ असार १४ पुनः मुद्दा दर्ता भएको थियो ।

सोही मुद्दाको सुनुवाइ गर्दै अदालतले निवेदकको दाबी नपुग्ने भएकाले उनलाई आरोपबाट सफाइ दिने फैसला सुनाएको हो । 

एक महिला अनुयायीले २०७६ कात्तिक ४ गते किटानी जाहेरीपछि सिद्धबाबाविरुद्ध मुद्दा दायर भएको थियो ।

सुनसरी जिल्ला अदालतको फैसला त्रुटिपूर्ण रहेको ठहर गर्दै उच्च अदालतले जिल्लाको फैसला उल्ट्याएको थियो । २०७९ जेठ ३ गते उच्च अदालतका कायममुकायम मुख्यन्यायाधीश सत्यमोहन जोशी थारू र किरणकुमारी गुप्ताको संयुक्त इजलासले सिद्धबाबालाई दिएको सफाइ जिल्ला अदालतको फैसला प्रमाण ऐनविपरीत भएको ठहर गरेको थियो ।

जिल्ला अदालतले गैरन्यायिक शैलीमा फैसला गरेको भन्दै उच्च अदालतले जिल्लाको फैसला बदर गरेको थियो । मुद्दा शुरूदेखि हेर्न उच्च समेतले जिल्ला अदालतलाई आदेश दिएको थियो ।