नक्कली भुटानी शरणार्थी प्रकरणसम्बन्धी मुद्दामा उच्च अदालत पाटनबाट आजै आदेश आउने भएको छ ।

खाजा समयपछि (करिब २ बजेपछि) आदेश गर्ने तयारी भएको उच्च अदालत पाटनका प्रवक्ता तीर्थराज भट्टराईले लोकान्तरलाई जानकारी दिए ।

मुद्दामा न्यायाधीशद्वय जनक पाण्डे र प्रकाश खरेलको संयुक्त इजलासमा निरन्तर सुनुवाइ हुँदै आएको छ ।

नक्कली भुटानी शरणार्थी प्रकरणमा काठमाडौं जिल्ला अदालतले पूर्व उपप्रधानमन्त्री टोपबहादुर रायमाझी, पूर्व गृहमन्त्री बालकृष्ण खाँण, तत्कालीन गृहसचिव टेकनारायण पाण्डे, भुटानी मानवअधिकारकर्मी नेता टेकनाथ रिजालसहित १६ जना प्रतिवादीलाई पुर्पक्षका लागि थुनामा पठाएको थियो ।

प्रतिवादीहरूले जिल्ला अदालतको आदेशविरुद्ध उच्च अदालतमा पुनरावेदन गरेका थिए ।

जिल्ला अदालतको आदेश बदर गरी पाऊँ भन्ने निवेदन लिएर प्रतिवादीहरू उच्च अदालत पाटन पुगेपछि जिल्ला अदालतको आदेश उपर सुनुवाइ हुँदै आएको हो ।

उच्च अदालत पाटनले जिल्ला अदालतको आदेशलाई सदर, बदर वा केही उल्टी गर्न सक्ने देखिन्छ ।

जिल्ला अदालतको आदेश बदर भएको खण्डमा प्रतिवादीहरू छुट्न सक्नेछन् भने सदर भएमा थुनामै रहनेछन् ।