नेपाली चलचित्रका अभिनेता एवं मोडल अयुब केसीले पछिल्लो समय आफूलाई निर्माताले भिलेनमा समेत नपत्याएको गुनासो गरेका छन् । 

सोमवार सामाजिक सञ्जालमा निराशाजनक स्टाटस लेख्दै उनले १७ वर्ष कलाकारितामा लागेर उपलब्धि शून्यजस्तै भएको उल्लेख गरेका छन् ।

‘हिरो खेलाओ भनेको पनि होइन, भिलेन नै देओ न । त्यो पनि पत्याएनन्’ उनले लेखेका छन् ‘१७ वर्ष यो पेशामा लागेँ, कुनै कसर नछाडि । तर उपलब्धि शून्यजस्तो ।’ अयुब कुनै समयमा चलेका मोडल हुन् । उनले १ सयभन्दा बढी म्युजिक भिडियोमा मोडलिङ गरेका छन् । एक दर्जन हाराहारी चलचित्रमा अभिनय गरेका उनी केही विज्ञापनहरूमा समेत देखिएका छन् । 

अहिले समय परिवर्तन भए पनि आफूभित्रको कला झन् निखारिएको अयुब बताउँछन् । सबैलाई समेटेर चलचित्र बनाउन उनले आग्रह गरेका छन् । उनले अब आफू पनि पलायन हुने उल्लेख गरेका छन् । ‘कलाकारले आत्महत्या त्यसै गरेका होइन रहेछन् । देश छोडेका त्यसै होइन रहेछन् । पीडा भएर नै होला’ उनले लेखेका छन् ‘ठिकै छ म एउटा कराएर पिना नसुक्ने होइन । आफैं कमाउनु लाग्छु अब । यत्तिका गएका छन्, म एउटा जाँदा के नै कमी होला । ५० वर्षमा कमब्याक गर्छु । आफैं बनाउँछु ।’ 

अयुबले निकै चलेका कलाकारहरूसँग पनि चलचित्रमा काम गरेका छन् । जीवन लुइँटेललगायतसँग ‘म तिम्रो भैसकेँ’, रेखा थापासँग ‘पँलास’मा उनले काम गरेका थिए ।

विगत केही वर्षयता उनी चलचित्र र म्युजिक भिडियोमा देखिएका छैनन् ।