निर्देशक दिवाकर भट्टराई र अभिनेत्री दीपिका प्रसाईंको जोडी बुबा–आमा बन्न लागेका छन् । 

अंग्रेजी नयाँ वर्षको शुभकामना दिँदै उनीहरू स्वयंमले आफूहरू बुबा–आमा बन्न लागेको खबर सार्वजनिक गरेका हुन् । 

दिवाकरले दीपीकाको ‘प्रेगनेन्सी फोटो’ फेसबुकमा सार्वजनिक गर्दै खुशी साटेका छन् ।

‘तिम्रो अनि मेरो जीवनको सबैभन्दा महत्वपूर्ण अनि सुन्दर परिचय थपिएको छ माया ! तिमी आमा बन्दै छौं अनि म बाबा । अनि म कति खुसी छु तिमीलाई कति धेरै माया गर्छु यो अनुभूति भन्नलाई यो शब्द अरु अपूरो छ । मलाई थाहा छ तिमीले बुझेको छौ, यो हाम्रो जीवनको अनि प्रेमको सुन्दर यात्रा हो माया । जीवनभर तिमीसँगै यसैगरी हिँड्न पाइराखौं, यही एउटा चाहना छ । ह्याप्पी न्यु इयर’ दिवाकरले लेखेका छन् । 

यस्तै, दीपिकाले पनि आफूले जीवनको सबैभन्दा ठूलो खुशी बाँड्न चाहेको बताउँदै आफूहरू अभिभावक बन्न लागेको र सन्तानलाई स्वागत गर्न लागेको उल्लेख गरेकी छन् । 

केही वर्षको प्रेम सम्बन्धपछि दिवाकर र दीपिकाले चार वर्षअघि विवाह गरेका थिए । उनीहरूको फिल्म ‘मायावी’ दर्शकमाझ आउने तयारीमा छ । दिवाकरले ‘स्टुपिड मन’, ‘ऐश्वर्य’, ‘क्याप्टेन’ जस्ता फिल्म निर्देशन गरेका छन् भने दीपिकाले ‘ऐश्वर्य’, ‘छक्का पञ्जा ३’लगायतका फिल्ममा शीर्ष अभिनेत्रीका रुपमा अभिनय गरेकी छन् ।