राष्ट्रिय प्रजातन्त्र पार्टी (राप्रपा)का अम्बरबहादुर विष्ट कोशी प्रदेश सभाको सभामुख बन्ने लगभग पक्का भएको छ ।

गत साउन १६ मा तत्कालीन सभामुख बाबुराम गौतमले पदबाट राजीनामा दिएपछि कोशी प्रदेश सभाको सभामुख पद रिक्त छ ।

गत असार २१ मा नेपाली कांग्रेसका नेता उद्धव थापा पहिलोपटक मुख्यमन्त्री बन्दा तत्कालीन सभामुख गौतमले पनि समर्थनमा हस्ताक्षर गरेका थिए ।

सभामुखको उक्त कदम संविधानसम्मत नभएको ठहर गर्दै साउन ११ मा सर्वाेच्च अदालतले थापालाई पदमुक्त गरिदिएको थियो । लगत्तै सभामुख गौतमलाई राजीनामा दिन लगाएर साउन १६ मा थापा दोस्रोपटक मुख्यमन्त्री बनेका थिए ।

अहिले सभा सञ्चालन उपसभामुख सिर्जना दनुवारले गर्दै आएकी छिन् ।  

सत्ता राजनीतिको जोडघटाउका कारण सभामुख पद लिन कुनै पनि दल तयार भइरहेका थिएनन् । अहिले राप्रपा सभामुख पद लिन तयार भएको छ ।

विष्ट सबैको सहमतिमा सभामुख बन्ने राप्रपाका एक नेताले बताए ।

‘यही मंसिर १९ गतेभित्र नै हाम्रो माननीयज्यू सभामुख भइसक्नुहुने थियो,’ राप्रपाका एक सांसदले भने, ‘मंगलवार बसेको कार्यव्यवस्था समिति बैठकमा एमालेले २४ गतेसम्म पर्खन आग्रह गरेकाले मात्रै रोकिएको हो, २५ गते सभामुख चयन हुन्छ ।’

विष्टलाई सभामुखको उम्मेदवार बनाउने भनेर निर्णय नै गरिसकेको राप्रपाकी प्रदेशसभा सदस्य सविना बजगाईँले बताइन् ।

‘हामीले अम्मर विष्टलाई सभामुख बनाउने निर्णय केही दिनअगाडि नै गरिसकेका छौं,’ बजगाईँले भनिन्, ‘अब यो निर्णयबाट ब्याक हुने अवस्था छैन ।’

राप्रपाले निर्णय गरे पनि सार्वजनिक भने गरेको छैन । केन्द्रका केही नेताले सभामुख लिन हुँदैन भनेर विरोध गरेकाले निर्णय सार्वजनिक नगरिएको नेताहरू बताउँछन् ।  

सरकार बनाउन र टिकाउन हम्मेहम्मे परिरहेको अवस्थामा राप्रपालाई सभामुख दिएमा केन्द्रको सत्ता गठबन्धन कोशीमा पनि बहुमतमा रहने पक्का हुन्छ ।

यसअघि एमालेले राप्रपालाई सभामुख लिन नदिएर सत्ता गठबन्धनमा बहुमत पुग्न दिएको थिएन । एमालेकै सांसदको हस्ताक्षरमा कांग्रेसका केदार कार्की मुख्यमन्त्री बनेपछि परिस्थिति फेरिएको हो । कार्कीलाई मुख्यमन्त्री बनाए पनि एमाले अहिले सरकारमा भने छैन ।

उपसभामुख सिर्जना दनुवार एमालेकी समानुपातिक सांसद हुन । उद्धव थापा नेतृत्वको सरकार ढाल्नका लागि एमालेअनुकूल भूमिका खेलेको भन्दै सत्ता गठबन्धन उनीसँग रुष्ट छ ।

उनले समेत सभामुखका लागि पहल गरे पनि सफल नहुने देखिएको एक नेताले बताए ।

कोशीमा राप्रपालाई सभामुख दिने सहमति भइसकेको नेकपा (माओवादी केन्द्र)का संसदीय दलका नेता इन्द्रबहादुर आङ्बोले बताए । 

राप्रपा कोशी प्रदेश सरकारमा समेत सहभागी हुने गठबन्धनका नेताहरूको दाबी छ । सभामुख चयनपछि एक डेढ महिनाभित्रै राप्रपा सरकारमा सहभागी हुने गठबन्धनका नेताहरूले बताएका छन् ।

‘अहिलेसम्म भएको छलफलमा सभामुख चयन भएको एक डेढ महिनाभित्र नै राप्रपा सरकारमा सहभागी हुने भन्ने छ,’ गठबन्धनका एक नेताले भने, ‘पहिला भाइ एमाले भन्थे, तुरुन्तै सरकारमा सहभागी हुँदा के भन्लान् भनेर ढिला गरी सहभागी हुन्छौं भन्नुभएको छ ।’ 

कोशीमा एमालेका उपसभामुखसहित ४०, काँग्रेसका २९, माओवादी केन्द्रका १३, राप्रपाका ६, एकीकृत समाजवादीका ४ र जसपाका एक सांसद छन् ।