नेपाली कांग्रेसका नेता कृष्ण प्रसाद सिटौला उम्मेदवारी दर्ता गर्न स्थलमार्गबाट विराटनगरतर्फ प्रस्थान गरेका छन् । राष्ट्रिय सभा निर्वाचनमा आइतबार कोशी प्रदेशबाट टिकट पाएका सिटौला लगत्तै काठमाडौँबाट विराटनगर प्रस्थान गरेका हुन् । 

हवाई मार्गबाट जानका लागि टिकट लिएपनि उडान स्थगित भएपछि आफू आइतबार साँझ स्थलमार्ग(गाडी)बाट विराटनगर हिँडेको सिटौलाले जानकारी दिए । 

उनले आफूले सर्वसम्मतरुपमा पार्टी सभापति शेरबहादुर देउवाको हस्ताक्षर भएको टिक दिउँसै पाएको पनि बताए । ‘मेरो टिकट दिउँसै सर्वसम्मतिमा टुंगिएको हो । साँझको फ्लाइटबाट विराटनगर जाने तयारी थियो । तर फ्लाइट क्यान्सिल भयो,  गाडीबाट विराटनगर जाँदैछु’, उनले भने । 

सत्ता गठबन्धनबाट १९ मध्ये १० सिट भाग पाएको कांग्रेसले अन्य उम्मेदवार टुंगो लगाउन प्रयास गरिरहेको छ । आइतबार रातिसम्म संसदीय बोर्डको बैठक बसिरहेपनि अन्य नामबारे ठोस सहमति जुटिसकेको छैन । बरु संस्थापन इतर समूहले मागेको जति सिट पाउन नसकेको भन्दै असन्तुष्टि पोखिरहेको छ।  

राष्ट्रियसभा निर्वाचनका लागि उम्मेदवारी दर्ताको मिति सोमबारका लागि तोकिएकाले आजै अबेरसम्म टिकट टुंगो लगाउनुपर्ने दवाव कांग्रेसलाई छ ।