स्विजरल्याण्डको डाभोसमा आयोजित विश्व आर्थिक मञ्च (डब्ल्युईएफ)ले विश्वव्यापी अनिश्चितताको सामना गर्ने र विश्वासको पुनर्निर्माण गर्न विश्वका देशहरूलाई आह्वान गर्दै २०२४ को वार्षिक बैठक सम्पन्न गरेको छ ।

विश्वमा बढ्दो खण्डीकरण र ध्रुवीकरणको पृष्ठभूमिमा बसेको डाभोस सम्मेलनले संवाद, सहयोग र साझेदारीलाई बढावा दिनको लागि एक महत्त्वपूर्ण प्लेटफर्मको रूपमा काम गरेको विश्वास गरिएको छ ।

विश्व आर्थिक मंचका अध्यक्ष बोर्गे ब्रेन्डेले विश्वव्यापी रूपमा 'एकताको नयाँ भावना' जगाउन फोरमको भूमिकालाई जोड दिए र सहयोगको माध्यमबाट 'बलियो परिणाम' को सम्भावनालाई हाइलाइट गरे ।

समापन सम्बोधनमा उनले बढ्दो विश्वव्यापी तापक्रम, कमजोर अर्थतन्त्र र खस्कँदै गएको सुरक्षा परिदृश्य लगायत विश्वले सामना गरिरहेका महत्वपूर्ण र जटिल चुनौतीहरूलाई स्वीकार गरे । उनले उल्लेख गरेका यी चुनौतीहरूले यस ग्रहमा बस्ने प्रत्येकलाई प्रभाव पारिरहेको छ ।

'हामीलाई आपसी सहयोगको आवश्यकता थाहा छ । पछिल्ला वर्षहरूमा विश्वास घट्दै गएको छ, त्यसैले विश्वासको पुनर्निर्माण सम्बन्धी यस हप्ताको बैठक धेरै महत्त्वपूर्ण भएको छ । विश्वभरका नेताहरू, सार्वजनिक र निजी क्षेत्रहरू र नयाँ पुस्ताको प्रतिनिधि भेला भएका बेला हामीले मिलेर काम गरेर के हासिल गर्न सकिन्छ भन्नेबारे महत्त्वपूर्ण छलफल गर्यौं,’ उनले भने ।

ब्रेन्डेले थपे, 'डाभोसमा एक हप्तामा जे हासिल भयो त्यसमा म धेरै गर्व गर्छु र अब यो आगामी वर्षमा थप अगाडि बढाउने कुरा हो।'

'हामीले विश्वासको पुन: निर्माण गर्नुपर्छ । भविष्यमा विश्वास, चुनौतीहरू सामना गर्ने हाम्रो क्षमतामा सबैभन्दा महत्त्वपूर्ण कुरा आपसी विश्वास नै हो,' विश्व आर्थिक मंचका संस्थापक र कार्यकारी अध्यक्ष क्लाउस श्वाबले भने,' 'विश्वास भनेको भावना मात्र होइन, विश्वास भनेको आशाको प्रतिवद्धता हो ।'

विश्व आर्थिक मंचको ५४ औं बैठकको लागि स्विट्जरल्याण्डको डाभोसमा १ सय २० भन्दा बढी देशका करिब ३ हजार प्रतिनिधिहरू स्विजरल्याण्डको डाभोसमा भेला भएका थिए । १५ देखि १९ जनवरीसम्म चलेको बैठकमा ४ सय ५० भन्दा बढी सेसन र कार्यशाला गोष्ठी सम्पन्न भएका छन् ।