राष्ट्रिय योजना आयोगले १६औं पञ्चवर्षीय योजनाका लागि प्रतिनिधि सभामा प्रतिनिधित्व गर्ने दलका प्रतिनिधि (सांसदहरू)सँग सुझाव लिएको छ ।

आयोग उपाध्यक्ष डा. मीनबहादुर श्रेष्ठको अध्यक्षतामा आइतवार भएको कार्यक्रममा आयोगले तयार गरेको मस्यौदामा दलका प्रतिनिधिहरूसँग सुझाव लिइएको हो ।

छलफल कार्यक्रममा नेपाली कांग्रेसका सांसद एवं पूर्व अर्थमन्त्री ज्ञानेन्द्रबहादुर कार्की, नेकपा माओवादी केन्द्रीका सांसद एवं पूर्वअर्थमन्त्री जनार्दन शर्मा, प्रमुख प्रतिपक्षी दल नेकपा एमालेका प्रमुख सचेतक एवं पूर्व मन्त्री पदम गिरी, एमाले सचेतक महेश बर्तौता, राष्ट्रिय स्वतन्त्र पार्टीकी सांसद सोविता गौतम, राप्रपाका सांसद ज्ञानेन्द्र शाहीलगायतका दलका प्रतिनिधिहरूको सहभागिता रहेको थियो ।

दलका प्रतिनिधिहरूले सबैले स्वीकार्ने र पूरा हुने लक्ष्यहरू १६औं योजनामा समावेश गर्न सुझाव दिएका छन् । छलफलमा आयोगका सबै सदस्यहरू, सदस्य सचिव र अन्य अधिकारीहरू सहभागी थिए ।

यसअघि आइतवार नै आयोग सदस्य डा. जयकान्त राउनको अध्यक्षतामा प्रतिनिधि सभाको संसदीय समितिका सभापतिहरूसँग सुझाव लिइएको आयोगका प्रेस सल्लाहकार रोयल आचार्यले जानकारी दिए ।​

संसदीय समितिका सभापतिहरूले योजनालाई यथार्थ परक र कार्यान्वयनयोग्य बनाई समाजवाद उन्मुख अर्थतन्त्र निर्माण गरी समृद्धि हासिल गर्नुपर्ने विषयमा जोड दिएका छन् ।

आत्मनिर्भर अर्थतन्त्र निर्माण गर्न जैविक तथा सामाजिक विविधतालाई सम्बोधन गर्दै कृषि, वन, सिमेन्ट तथा फलामजन्य उद्योग, निर्माण लगायतका क्षेत्रमा केन्द्रीय रहनुपर्ने धारणा सभापतिहरूको थियो ।