भारतीय अभिनेत्री पूनम पाण्डेको निधन

भारतीय अभिनेत्री तथा मोडल पूनम पाण्डेको ३२ वर्षको उमेरमा निधन भएको छ । शुक्रबार बिहान उनको सोसल मिडियामार्फत निधनको खबर सार्वजनिक भएको हो । 

पाण्डेको इन्स्टाग्राम अकाउन्टमा सेयर गरिएको पोस्टमा लेखिएको छ, ‘आजको बिहान हाम्रा लागि कठिन छ । पाठेघरको मुखको क्यान्सरका कारण हामीले हाम्रो प्यारी पूनमलाई गुमाउनु भएको जानकारी गराउँदा अत्यन्त दुःख लागेको छ । उहाँको सम्पर्कमा आउने जो कोही पनि उहाँलाई मायाले भेट्नुभयो । हामी शोकको यस समयमा गोपनीयता अनुरोध गर्नेछौँ र उनीहरूले हामीसँग साझा गरेका सबै कुराको लागि उनीहरूलाई मायापूर्वक सम्झनेछौँ ।’ 

पाण्डेको मृत्युको खबर उनका म्यानेजरले पुष्टि गरिसकेको भारतीय सञ्चारमाध्यमले जनाएका छन् । म्यानेजरका अनुसार बिहीवार राती नै अभिनेत्री पाण्डेको मृत्यु भएको हो । 

उनले गृहनगर कानपुरमा अन्तिम सास लिएको बताइएको छ । निधनको खबर सुनेर उनका फ्यानहरु स्तब्ध भएका छन् । 

११ मार्च १९९१ भारतको कानपुरमा जन्मिएकी पाण्डेले सन् २०१३ मा फिल्म ‘नशा’ बाट बलिउडमा डेब्यू गरेकी थिइन् । उनी पछिल्लो पटक फिल्म ‘द जर्नी अफ कर्मा’ मा देखिएकी थिइन् । यी अभिनेत्री सोसल मिडियामा निकै चर्चित थिइन् ।