आईसीसी क्रिकेट विश्वकप लिग–२ अन्तर्गत आज नेपालले नेदरल्यान्ड्सको सामना गर्दै छ । दुई देशबीचको खेल त्रिवि क्रिकेट मैदानमा बिहान साढे ९ बजेदेखि शुरू हुनेछ । 

यसअघिका तीन खेलमध्ये एक खेलमा मात्र जीत निकालेका दुवै टोली आज विजयी नतिजाका साथ जारी शृंखला अन्त्य गर्ने लक्ष्यमा हुनेछन्।

नेपाल यसअघि पहिलो खेलमा नामिबियासँग चार विकेटले पराजित भएको थियो । दोस्रो खेलमा नेदरल्यान्ड्सलाई नौ विकेटले हराएको नेपाल तेस्रो खेलमा पुनः नामिबियासँग दुई विकेटले पराजित भएको थियो । 

नेदरल्यान्ड्सले नेपालसँग हार बेहोरे पनि दोस्रो खेलमा नामिबियालाई सात विकेटले हराएको थियो । तेस्रो खेलमा भने नामिबियाविरुद्ध २४ रनले पराजित भएको थियो ।

पहिलो शृंखलाका चार खेल खेलिसकेको नामिबिया लिग–२ तालिकाको शीर्ष स्थानमा छ । नामिबियाको ६ अंक छ । 

समान तीन खेल खेलेका नेपाल र नेदरल्यान्ड्स भने दुई अंकसहित क्रमशः तालिकाको दोस्रो र तेस्रो स्थानमा छन् ।