‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ–
दल विभाजनका लागि केन्द्रीय समिति र संसदीय दलका ४० प्रतिशतको समर्थन जुटाउनुपर्ने व्यवस्थासहित राजनीतिक दलसम्बन्धी दोस्रो संशोधन विधेयक २०८० प्रतिनिधि सभामा पेश भएको छ ।

नेपाली कांग्रेसका सभापति शेरबहादुर देउवा प्रधानमन्त्री रहेको समयमा केन्द्रीय समितिका २० प्रतिशतले दल विभाजन गर्न पाउने गरी अध्यादेश ल्याइएको थियो । 

२०७८ भदौ ११ गते ल्याएको अध्यादेश खारेज भएपछि राजनीतिक दलसम्बन्धी विधेयक २०७३ को साबिक व्यवस्था गर्न सरकारले संसद्मा विधेयक ल्याएको हो ।
००००
अध्यागमन विभागले निषेधित क्षेत्रमा जाने स्वदेशी तथा विदेशी पर्यटकका लागि विद्युतीय प्रणाली (अनलाइन)मार्फत रुट परमिट जारी गरेको छ ।
ट्रेकिङ एजेन्सीज् एसोसिएसन अफ नेपाल (टान)को पहलमा विभागले निषेधित क्षेत्रमा घुम्न जाने पर्यटकलाई अनुमतिपत्र प्राप्त गर्ने प्रक्रियालाई सहज बनाउनका लागि विद्युतीय माध्यमबाट ‘रुट परमिट’ लिनसक्ने व्यवस्था गरेको हो ।
००००
प्रमुख प्रतिपक्षी दल नेकपा एमालेले विवादमा परेका ३ जना मन्त्री (प्रकाश ज्वाला, मोहनबहादुर बस्नेत र सुदन किराँती)को राजीनामा माग गरेको छ ।
आइतवार बसेको प्रतिनिधि सभा बैठकको आकस्मिक समयमा एमाले प्रमुख सचेतक पदम गिरीले तीन जना मन्त्रीमाथिको कारबाहीबारे संसद्मा प्रधानमन्त्री पुष्पकमल दाहाल प्रचण्डको जवाफ माग गरेका हुन् ।

एमालेसहित प्रतिनिधि दलले विवादित मन्त्रीलाई हटाउन निरन्तर दवाव दिँदै आएको छ । 
यसैबीच प्रधानमन्त्री प्रचण्डले मन्त्रिपरिषद नै मन्त्रिपरिषद् पुनर्गठन चाहेका छन्  । प्रचण्डले कामलाई गतिदिन आफूले मन्त्री फर्नै पर्ने भएपनि फेर्ने बताउँदै आएका छन् । त्यसमाथि मन्त्रीहरु विवादित बनेपछि उनीमाथि थप प्रेसर बढेको छ । 

प्रधानमन्त्रीले राष्ट्रियसभा निर्वाचनलगत्तै मन्त्री हेरफेर गर्ने भनिएपनि कांग्रेसको महासमिति बैठक, माओवादीको विधान अधिवेशनलगायतका कारणले गठबन्धनमा छलफल समेत हुन सकेको थिएन । अब छिट्टै यसबारेमा छलफल भएर विवादित मन्त्री हटाउनेदेखि समग्र मन्त्रीपरिषद्को पुनर्गठन नै हुने गठबन्धनका नेताहरुको भनाइ छ । 
००००
निर्वाचन आयोगले आगामी वैशाख १५ गते उपनिर्वाचन गर्ने निर्णय गरेको छ । 
नेकपा एमालेका सांसद सुवास नेम्वाङको निधनपछि खाली भएको इलाम २, बझाङको प्रदेशसभा १ मा आगामी वैशाख १५ गते उपनिर्वाचन गर्ने आयोगले जनाएको हो ।
००००
जनता समाजवादी पार्टी, (जसपा) नेपालले महाधिवेशनमा प्रस्तुत हुने दस्ताबेजको मस्यौदा तयार गर्न समिति गठन गरेको छ । 
पार्टीको केन्द्रीय कार्यकारिणी समितिको बैठकले पार्टी अध्यक्ष उपेन्द्र यादवको संयोजकत्वमा २१ सदस्यीय राजनीतिक प्रतिवेदन मस्यौदा समिति गठन गरेको सो पार्टीका प्रचारप्रसार तथा प्रकाशन विभाग प्रमुख पूर्ण बस्नेतले जानकारी दिए ।
००००
नेपाली कांग्रेस संसदीय दलले पार्टीका बहालवाला राष्ट्रियसभा सदस्य र नवनिर्वाचित सदस्यबीच परिचयात्मक भेटघाट कार्यक्रम आयोजना गरेको छ ।

कांग्रेस संसदीय दलको कार्यालयमा आइतबार भएको कार्यक्रममा नवनिर्वाचित राष्ट्रियसभाका सदस्यहरुलाई कांग्रेस राष्ट्रियसभामा संसदीय दलका नेता रमेशजङ्ग रायमाझीले स्वागत गरेका थिए ।

 त्यस अवसरमा उनले राष्ट्रियसभामा हालसम्म कांग्रेसको भूमिका, राष्ट्रियसभा र विषयगत समितिहरुमा कांग्रेसको कार्यसम्पादनबारे नवनिर्वाचित राष्ट्रियसभा सदस्यहरुलाई जानकारी गराएका थिए ।
००००
नेपाल कम्युनिष्ट पार्टी माओवादी केन्द्रका नेताहरुको कार्यविभाजनका सन्दर्भमा आवश्यक तयारी पूरा नभएपछि आइतबारका लागि निर्धारण भएको स्थायी समितिको बैठक आगामी मङ्गलबार हुने भएको छ । 

पार्टी केन्द्रीय कार्यालय पेरिसडाँडामा भएको पदाधिकारीको अनौपचारिक बैठकपछि स्थायी समितिको बैठक मङ्गलबार गर्ने निर्णय भएको पार्टी प्रवक्ता एवं उपाध्यक्ष अग्निप्रसाद सापकोटाले जानकारी दिए ।
००००
आन्दोलनरत अनुचित लेनदेन (मिटरब्याज) पीडितलाई सरकारले छलफलका लागि बोलाएको छ । मिटरब्याज तथा ठगीविरुद्ध किसान मजदुर सङ्घर्ष समितिलाई आइतवार पत्र पठाउँदै गृह मन्त्रालयले वार्ताका लागि बोलाएको हो ।

गृह मन्त्रालयका सहसचिव रुद्रप्रसाद पण्डितको संयोजकत्वमा वार्ता टोली गठन गरिएको मन्त्रालयका उपसचिव एकदेव अधिकारीले जानकारी दिए ।
००००
न्याय परिषद्ले दुई न्यायाधीशलाई बर्खास्त गर्न सिफारिश गरेको छ ।
आइतवार बसेको न्याय परिषद बैठकले उच्च अदालत जुम्लाका न्यायाधीश डा नवराज थपलिया र काठमाडौं जिल्ला अदालतका न्यायाधीश अम्बिकाप्रसाद निरौलालाई बर्खास्त गर्न सिफारिश गरेको हो ।

त्यसै गरी घुस अडियो प्रकरणमा मुछिएका काठमाडौं जिल्ला अदालतका न्यायाधीश राजकुमार कोइरालालाई सचेत गराइएको छ ।
००००
अख्तियार दुरुपयोग अनुसन्धान आयोगले झापाको चन्द्रगढीस्थित नापी कार्यालयका प्रमुख विष्णुकुमार न्यौपानेसहित १७२ जनाविरुद्ध भ्रष्टाचार मुद्दा दायर गरेको छ ।

हालसाबिक जग्गा दर्ता प्रक्रियाबाट सरकारी सार्वजनिक जग्गा व्यक्तिको नाममा दर्ता गरी गैरकानूनी लाभ तथा हानी र्पुयाई भ्रष्टाचार गरेको भन्दै आयोगले आइतवार विशेष अदालतमा मुद्दा दायर गरेको हो । १७२ जना प्रतिवादीमध्ये २८ जना सरकारी कर्मचारीहरू रहेका आयोगले जनाएको छ ।
००००
आईसीसी क्रिकेट विश्वकप लिग २ मा घरेलु टोली नेपाल नेदरल्यान्ड्सँग सहजै पराजित भएको छ ।
कीर्तिपुरस्थित त्रिवि मैदानमा आइतवार भएको खेलमा पाहुना टोली नेदरल्यान्ड्सले नेपालमाथि ८ विकेटको सहज जीत निकालेको हो ।
००००
साताको पहिलो दिन आइतबार नेपाल स्टक एक्सचेन्ज (नेप्से) परिसूचक २६ दशमलव  ८१ अङ्कले ओरालो लागेको छ । परिसूचक एक दशमलव ३३ प्रतिशतले घटेर एक हजार नौ सय ७९ दशमलव ०२ विन्दुमा कायम भएको हो ।