नेकपा एमालेका अध्यक्ष केपी शर्मा ओलीले अर्थमन्त्री डा. प्रकाशशरण महतको कार्यशैली निरंकुश भएको आरोप लगाएका छन् । सभामुख र राष्ट्रिय सभा अध्यक्षलाई अपमान गरेको उनले आरोप लगाए ।

सरकारले संसद्‌मा पेश गरेको बजेटका प्राथमिकता र सिद्धान्तबारे एमाले सांसद र अर्थविद्सँगको छलफलमा ओलीले अर्थमन्त्री महत निरंकुश बन्दै गएको आरोप लगाएका हुन् । 

‘सभामुखलाई अर्थमन्त्रीले विदेशमा जाँदा पीए लैजान  पाइँदैन, म आफू पनि सुटकेस घिसारेर जान्छु भनेर भनेछन् । सरकारले दिन्छु भनेको बजेट दिएको छैन, कर्मचारीहरूले तनखा खान पाइरहेका छैनन् । यो सरकार शक्ति पृथकीकरणको सिद्धान्त बुझ्दैन भने डेमोक्रेसी के बुझोस्’, ओलीले भने ।

सरकारका मन्त्रीहरू तानाशाही, स्वेच्छाचारी र आफै सर्वेसर्वाजस्तो बन्न खोजेको आरोप ओलीले लगाए ।

‘यस्तो बेहालको लोकतान्त्रिक सरकार छ, यस स्तरको अर्थमन्त्री छन् । अर्थमन्त्री यस्तो डिक्टेटर हुन्, जसलाई नियम कानून प्रचलन केही चाहिँदैन । न कसैसँग परामर्श गर्छन्’, ओलीले भने, ‘सुनेको, अर्थशास्त्रमा पीएचडी गरेको हो । कुन अर्थशास्त्रमा कहाँबाट ? देश ओरालो लगाउन २०४८ सालमा असफल भएका सिद्धान्त दोहोर्‍याउन खोजेका छन् ।’