सत्ता समीकरणबारे तनावपूर्ण स्थिति आएपछि कांग्रेस सभापति शेरबहादुर देउवाले मन्त्रीहरूलाई आफ्नो निवासमा बोलाएर छलफल गरेका छन् । सत्ता समीकरण फेरबदल गर्नेसम्मको तयारी भएपछि देउवाले कांग्रेसका १० मन्त्रीहरूलाई बोलाएर छलफल गरेका हुन् । 

आइतबार साँझ बुढानीलकण्ठमा पुगेका मन्त्रीहरूले सरकारबारे राम्रो कुरा सुनिँदैन नि भन्दा देउवाले बाहिर आएजस्तो समस्या नभएको भन्दै आश्वस्त तुल्याउने प्रयास गरेका थिए । 

‘सभापतिले बजेट निर्माण सदनमा प्रभावकारी उपस्थितिसहितका विषयमा बढी कुरा गर्न खोज्नुभएको थियो’, भेटमा सहभागी भएका एक मन्त्रीले लोकान्तरसँग भने, ‘तर मन्त्रीहरुले सत्ता गठबन्धनमा खबर राम्रो सुनिएको छैन के हो भनेर सोध्यौँ । सभापतिले बाहिर आए जस्तो समस्या छैन भनेर भन्नुभयो । तर परिस्थिति हामीले सोचेको भन्दा बाहिर गएको छनक पाएका छौँ ।’

सरकारमा बसेर प्रभावकारी काम गर्न नसकेको र सदनमा समेत नियमित नगएकोबारे देउवाले मन्त्रीहरूसँग प्रश्न गरेका थिए । ‘तपाईँहरूको कामबारे पार्टीदेखि बाहिरसम्मै प्रश्न उठेका छन् । सदनमा त तपाईँहरू जानु नै हुँदैन भन्ने प्रश्न उठिरहेको छ’ देउवाको भनाइ उद्धृत गर्दै एक मन्त्रीले भने, ‘उहाँले मन्त्रीहरूलाई फिर्ता नै हुनुस् भनेर त भन्नुभएन । राम्रो काम नगर्ने भए छोड्नुस् नै भन्ने आशय थियो ।’

सरकारको भविष्यबारे मन्त्रीहरुले  चिन्ता गर्दा  देउवाले भने उल्टै झोक्किँदै पार्टीका मन्त्रीको कामप्रति असन्तुष्टि जनाएका थिए ।  ती मन्त्रीका अनुसार आफ्नो लागि भन्दा पनि प्रधानमन्त्रीप्रति उत्तरदायी भएर काम देखाउन देउवाले निर्देशन दिएका थिए । देउवाको प्रस्तुतिले गठबन्धनको भविष्यप्रति उनी पनि त्यति आश्वस्त भएको नपाइएको ती मन्त्रीको भनाइ छ । 

एक घण्टासम्म चलेको छलफलमा कांग्रेसका १० मन्त्रीका साथसाथै नेताद्वय कृष्णप्रसाद सिटौला र रमेश लेखक पनि सहभागी भएका थिए । 

भेटमा सहभागी भएका एक मन्त्रीले पछिल्लो केही दिनयता प्रधानमन्त्री र एमाले अध्यक्षबिच भइरहेको छलफलले सरकार सहजै अगाडि बढ्छ भन्ने नदेखिएको बताए ।  

‘गठबन्धन हामीसँग छ । तर प्रधानमन्त्रीको नियमित उठबस पछिल्लो समय एमाले अध्यक्षसँग देखिनुले राम्रो संकेत गरेको छैन,’ ती मन्त्रीले भने, ‘हाम्रो कामबाट समीक्षा एउटा होला । तर नराम्रो गरिएको छैन । हट्नै परे पनि हामी तयार छौँ ।’