कोरोलोभ– रुसको एक अदालतले सामाजिक सञ्जालमा युक्रेन आक्रमणको आलोचना गरेको आरोपमा एक पत्रकारलाई बुधवार सात वर्षको कारागार (जेल) सजाय सुनाएको छ । 

५१ वर्षीय रोमन इभानोभमाथि रुसको सशस्त्र बलहरूका बारेमा ‘झुटो सूचना’ आरोपमा दोषी पाइयो र मसकोको कडा सैन्य सेन्सरसिप कानूनअन्तर्गत दण्डित गरियो । मस्कोले युक्रेनमाथि आफ्नो पूर्णस्तरको सैन्य आक्रमणको सार्वजनिक आलोचनालाई समाप्त पार्नका लागि सशस्त्र बलहरूलाई ‘अपमानित’ गर्ने वा ‘झुटो सूचना’ प्रकाशित गर्नेविरुद्ध कानूनहरूको प्रयोग गरेको छ । 

सजाय सुनाइएपछि इभानोभले अदालत कक्षबाट बाहिर निस्कँदै गर्दा चिच्याउँदै भने, ‘शान्ति र स्वतन्त्रता ।’ उनका समर्थकहरूले कराउँदै र ताली बजाउँदै भने, ‘हामी तपाईंसँगै छौँ, तपाईं एक्लो हुनुहुन्न ।’

सन् २०२२ मा टेलिग्राम र भिकोन्टेक सामाजिक सञ्जाल साइटहरूमा प्रकाशित पोस्टहरूमा इभानोभले युक्रेनमा रुसको सैन्य आक्रमण र युक्रेनी सहर बुचामा उसको कार्यहरूको आलोचना गरेका थिए । उनलाई गत वर्ष पक्राउ गरिएको थियो र उनले आफू निर्दोष रहेको बताएका थिए । 

‘रुसमा पत्रकारिता अब अवस्थित छैन,’ पछिल्लो सुनुवाइमा अदालतलाई दिएको अन्तिम बयानमा उनले भने, ‘हामीले हाम्रा चारैतिर दुःख किन बीजारोपण गरिरहेका छौँ र हाम्रो मुलुक दुःखको पहिरोमा किन परिवर्तन भएको छ भनेर हामीले स्वयंलाई सोध्नुपर्छ ।’

इभानोभ एउटा स्थानीय सरकारी टीभी च्यानलमा काम गर्थे तर सन् २०२१ मा मस्कोको उत्तरपूर्वी शहर कारोलियोभमा कथित भ्रष्टाचार, चुनावी जालसाजी र पर्यावरणीय समस्याहरूमाथि रिपोर्ट गरेपछि उनलाई बर्खास्त गरिएको थियो ।  

बुधवारको फैसलापछि अदालतको कक्षबाहिर बोल्दै इभानोभकी आमाले स्थानीय अधिकारीहरूले उनको रिपोर्टिङको प्रतिशोधका रूपमा उनीविरुद्ध मुद्दा दर्ता गर्न आदेश दिएको बताइन् । ‘उनीअगाडि जे छ त्यो पूर्ण बनावटी हो,’ अल्ला इभानोभाले भने, ‘म लड्न जारी राख्नेछु ।’