‘लोकान्तर राउण्ड अप’मा पाठकवृन्दलाई स्वागत छ । सधैँझैँ आज पनि हामी बितेको २४ घण्टाका मुख्य मुख्य घटनाक्रमसहित उपस्थित भएका छौँ–

आज राष्ट्रिय सभाले नयाँ अध्यक्ष पाउँदै छ । अध्यक्ष पदको मतदानका लागि आज बिहान ११ बजेर ९ मिनेटमा राष्ट्रिय सभा बैठक बोलाइएको छ । 

राष्ट्रिय सभा अध्यक्ष पदको प्रस्तावको निर्णय सदस्यको दस्तखतसहितको मत विभाजनद्वारा हुने कानुनी व्यवस्था छ । राष्ट्रिय सभा नियमावलीअनुसार एउटा मात्रै प्रस्ताव दर्ता भएमा समर्थक सदस्यले बोलिसकेपछि अध्यक्षता गर्ने व्यक्तिले प्रस्तावित सदस्य अध्यक्ष पदमा निर्विरोध निर्वाचित भएको घोषणा गर्ने छ तर, दुई वटा प्रस्ताव दर्ता भएकाले दर्ता क्रमानुसार प्रस्तावक सदस्यले प्रस्ताव प्रस्तुत गर्ने र समर्थक सदस्यले समर्थन गर्ने छन् । 

बैठकमा दुवै प्रस्तावमाथि सङ्क्षिप्त छलफल हुने छ र त्यसपछि अध्यक्षता गर्नेले सबै प्रस्तावलाई क्रमश: निर्णयार्थ प्रस्तुत गर्ने छन् । राष्ट्रिय सभाका अध्यक्ष गणेशप्रसाद तिमिल्सिनासहित एक तिहाइ सदस्यको पदावधि गएको फागुन २० गते सकिएको थियो । 

राष्ट्रिय सभा अध्यक्षका लागि माओवादी केन्द्रका नारायणप्रसाद दाहाल र नेपाली कांग्रेसका युवराज शर्माले उम्मेदवारी दर्ता गराएका छन् ।  राष्ट्रिय सभामा सत्ता गठबन्धनले अध्यक्ष सहजै जित्ने अंकगणित छ ।

००००

सरकार र मिटरब्याज तथा ठगीविरुद्ध किसान–मजदुर सङ्घर्ष समितिबीच आज चारबुँदे सहमति भएसँगै आन्दोलन स्थगित भएको छ । उपप्रधानमन्त्री एवं गृहमन्त्री रवि लामिछानेको पहलमा गृह मन्त्रालयमा सोमबार भएको वार्तामा सहमति भएसँगै पीडितले आन्दोलन फिर्ता लिएका हुन् । 

पीडितको समस्या दीर्घकालीन रुपमा समाधान गर्नुपर्ने भएकाले जाँचबुझ आयोग ऐन, २०२६ बमोजिम तीन महिनाभित्र प्रतिवेदन पेस गर्ने गरी अनुचित लेनदेन  विरुद्ध जाँचबुझ आयोग गठन गर्ने गरी सहमति भएको छ ।

००००

राष्ट्रिय स्वतन्त्र पार्टीले बझाङमा हुने प्रदेशसभा उपनिर्वाचनमा भाग नलिने भएको छ ।  

रास्वपाको केन्द्रीय समितिको सोमबार बसेको बैठकले आगामी वैशाख १५ गते हुने बझाङको प्रदेशसभा उपनिर्वाचनमा भाग नलिने

 तर इलाम जिल्ला निर्वाचन क्षेत्र नं २ को प्रतिनिधिसभा सदस्यको उपनिर्वाचनमा भने भाग लिने निर्णय गरेको पार्टीका महामन्त्री एवं प्रवक्ता डा मुकुल ढकालले जानकारी दिए ।

००००

संसदको पाँचौँ ठुलो दल राप्रपा वर्तमान सत्ता गठबन्धनमा सहभागी नहुने भएको छ । यस्तै फागुन ३० मा प्रधानमन्त्री प्रचण्डले विश्वासको मत लिँदा विपक्षमा मतदान गर्ने निर्णय समेत राप्रपाले गरेको छ।  

राप्रपाको राजधानीमा सम्पन्न कार्यसम्पादन समितिको बैठकले गठबन्धनमा सहभागी नहुने र प्रधानमन्त्रीलाई विश्वासको मत पनि नदिने निर्णय गरेको प्रवक्ता मोहन श्रेष्ठले जानकारी दिए । 

उनका अनुसार पार्टी तत्काल प्रदेश सरकारमा पनि सहभागी हुनेछैन । बैठकले काठमाडौँ केन्द्रीय प्रदर्शनको मिति पनि सार्ने निर्णय गरेको छ । 

००००

नेकपा एकीकृत समाजवादीले आफूहरूका लिखित मागमा प्रधानमन्त्रीले लिखित सहमति जनाए मात्रै विश्वासको मत दिने निर्णय गरेको छ ।

सोमवार बसेको संसदीय दलको बैठकले प्रधानमन्त्रीले लिखित सहमति गरे मात्रै राष्ट्रिय सभामा भोट हाल्ने र विश्वासको मत दिने जानकारी नेकपा एसका प्रमुख सचेतक मेटमणि चौधरीले दिए । प्रतिनिधिसभामा नेकपा एसले विश्वासको मत नदिए प्रधानमन्त्रीलाई मुस्किलको बहुमत पुग्छ ।

००००

नेपाली कांग्रेसले प्रधानमन्त्री पुष्ककमल दाहाल प्रचण्डलाई विश्वासको मत नदिन ह्वीप जारी गरेको छ । कांग्रेसका प्रमुख सचेतक रमेश लेखकले सोमबार विज्ञप्ति जारी गर्दै प्रधानमन्त्रीले लिन लागेको विश्वासको प्रस्तावको विपक्षमा मतदान गर्न ह्वीप जारी गरेका हुन् ।

००००
गण्डकी, मधेश र सुदूरपश्चिम प्रदेशका प्रदेश प्रमुख फेरिएका छन् ।

प्रधानमन्त्री तथा मन्त्रिपरिषद्को कार्यालयमा सोमवार बसेको मन्त्रिपरिषद् बैठकले प्रदेश प्रमुख फेरबदल गरेको हो । जसअनुसार मधेश प्रदेशमा सुमित्रा भण्डारी र गण्डकीमा डिल्लीराज भट्ट छन् ।

यस्तै सुदूरपश्चिम प्रदेशमा नजिर मियाँको नियुक्तिको लागि सिफारिस गरिएको छ ।

मियाँ अर्घाखाँचीका एमाले नेता हुन् । कोशी, बागमती, लुम्बिनी र कर्णाली प्रदेशका प्रदेश प्रमुखलाई यथावत् राखिएको छ ।

००००

गृहसचिवका रूपमा एकनारायण अर्यालको सरुवा भएको छ ।

मन्त्रिपरिषद्को सोमबार बसेको बैठकले अर्याललाई गृहसचिव बनाउने निर्णय गरेको एक मन्त्रीले जानकारी दिए ।

००००

नेपाली कांग्रेसका केन्द्रीय सदस्य डा शशाङ्क कोइरालाले बेइमानीको राजनीति धेरै समय नटिक्ने बताएका छन् । नवलपरासी बर्दघाट सुस्तापूर्वको पिठौलीमा सोमबार आयोजित कार्यक्रममा उनले वर्तमान सरकार राजनीतिक धोकाबाट बनेको आरोप लगाए ।

००००

सुदूरपश्चिम प्रदेशका नवनियुक्त मन्त्री लक्ष्मणकिशोर चौधरीले पद तथा गोपनीयताको शपथ लिएका छन् ।

सोमवार मुख्यमन्त्री कमलबहादुर शाहले मन्त्रिपरिषद् पुनर्गठन गरेर नागरिक उन्मुक्ति पार्टीका लक्ष्मणकिशोर चौधरीलाई मन्त्री नियुक्त गरेका थिए । लगतै उनले सोमवार साँझ नै शपथ ग्रहण गरेका हुन् ।

००००

नयाँ समीकरण बनेदेखि नै प्रधानमन्त्री पुष्पकमल दाहाल प्रचण्ड र एमाले र अध्यक्ष केपी शर्मा ओलीबीच भेटवार्ता हुँदै आएको छ । यसै सिलसिलामा प्रचण्ड र ओलीबीच सोमवार भेटवार्ता भएको छ।

भेटमा राष्ट्रिय सभा अध्यक्षको निर्वाचन, सरकारको साझा न्यूनतम् कार्यक्रम र समसामयिक राजनीतिक विषयमा कुराकानी भएको जानकारी दिए प्रधानमन्त्रीका प्रेस सल्लाहकार गोविन्द आचार्यले दिए ।

००००

राष्ट्रिय सभा अध्यक्षका उम्मेदवार नारायणप्रसाद दाहालले आफूलाई माओवादी केन्द्रका अध्यक्ष पुष्पकमल दाहाल प्रचण्डको भाइ भनेकामा असन्तुष्टि जनाएका छन् ।

 राष्ट्रियसभा अध्यक्षमा उम्मेदवारी दर्ता गरेपछि दाहाललाई संसद् भवन नयाँ बानेश्वरमा पत्रकारहरूले प्रचण्डको भाइ भएका कारण अवसर पाएको भनिन्छ नि भनेर सोधेका थिए ।

तर, उनले पार्टीमा आफूले दिएको योगदान र जिम्मेवारीका आधारमा उम्मेदवारी दिएको बताए ।