उपप्रधान तथा गृहमन्त्री रवि लामिछानेले सहकारी ठगी प्रकरणमा फरार रहेका गीतेन्द्र (जीबी) राईलाई पक्राउ गरेरै छाड्ने प्रतिबद्धता जनाएका छन् ।

शनिवार आफू नेतृत्वको दल राष्ट्रिय स्वतन्त्र पार्टी (रास्वपा)ले आयोजना गरेको कार्यक्रममा उनले राईलाई पक्राउ गर्न पहल गरिरहेको स्पष्ट पारे ।

गृहमन्त्री लामिछानेले राईको मात्र नभएर उनलाई भगाउनेको पनि खोजी हुने बताए । 

‘आकाशमा होस्, पातलमा होस् समाएर ल्याउछौं, समय लाग्ला कसले भगायो त्यो पनि खोज्छौं’, उनले भने ।

रास्वपाका सभापतिसमेत रहेका लामिछानेले राईसँग आफ्नो कुनै सम्बन्ध नरहेको पनि दाबी गरे । ग्यालेक्सी टेलिभिजनमा राईसँग काम गरेको स्वीकार्दै उनले त्यो छाडेपछि उनीसँगको नाता पनि सकिएको उल्लेख गरे ।

आफूलाई अनावश्यक रुपमा सहकारी ठगीमा मुछिएका राईसँग जोडिएकोमा गुनासो पनि गरे ।

गृहमन्त्री लामिछानेले गत मंगलवार संसद् बैठकबाट निस्किने क्रममा पनि सञ्चारकर्मीले सोधेको ‘जीबी राई कहिले पक्राउ पर्छन् ?’ भन्ने प्रश्नको जवाफ दिँदै पक्राउ गर्न काम भइरहेको दाबी गरेका थिए ।

‘काम गर्दैछु, गरेपछि थाहा हुन्छ, भएपछि ब्रेकिङ गर्नुहोस्,’ उनले भनेका थिए ।

पोखराको सूर्यदर्शन सहकारीका संस्थापक अध्यक्ष राई र उनको समूहले सहकारीका बचतकर्ताको १६ अर्बभन्दा बढी रकम दुरुपयोग गरेको उजुरी छ ।

राई अहिले फरार छन् । उनी विदेशमा लुकिरहेको आशंका गरिएको छ । 

कांग्रेसलाई गृहमन्त्री लामिछानेको चुनौती : तपाईंहरू नेता बोकेर आउनुस्, म एक्लै आउँछु