राप्रपा नेपालका अध्यक्ष कमल थापाले नेपालमा अहिले धर्म परिवर्तनको डढेलो लागेको बताएका छन् । उनले पहाडका सिङ्गो गाउँ गाउँमा धर्म परिवर्तन भएको बताए ।

राप्रपा नेपाल, रुपन्देहीले आइतबार भैरहवामा आयोजना गरेको जिल्लास्तरीय अगुवा कार्यकर्ता भेला तथा प्रशिक्षण कार्यक्रमलाई सम्बोधन गर्दै अध्यक्ष थापाले यस्तो बताएका हुन् । उनले भने, ‘तराईमा पनि म सुन्दै छु, बिस्तारै यो धर्म परिवर्तनको महारोग सल्किएर गएको छ । हामीलाई कुनै पनि धर्मको विरोध गर्नु छैन । इसाईहरू आजभन्दा ७० वर्ष अगाडि औलामा गन्न सक्ने सङ्ख्यामा थिए । १०–१२ जना मात्र थिए याद राख्नुस् । अहिले लाखौँको सङ्ख्यामा भएका छन् ।’

उनले पश्चिमा मुलुकहरूले भारत र चीनलाई नियन्त्रण गर्नको निमित्त धर्म परिवर्तन गराएर नेपाललाई सांस्कृतिक उपनिवेश बनाउन खोजिरहेको र त्यसमा प्रमुख राजनीतिक दलहरू हतियारको रूपमा प्रयोग भएको आरोप लगाए।

पूर्व उपप्रधान तथा गृहमन्त्री समेत रहेका थापाले यो धर्म परिवर्तनको लहरले सनातन धर्म कमजोर मात्र हुने नभई नेपालमा कहिले नभएको धार्मिक, सांस्कृतिक द्वन्द्व, विवाद, झगडा, युद्ध हुन सक्ने खतरा देखिएको बताए । 

अध्यक्ष थापाले नेपालमा सङ्घीय धर्म निरपेक्ष गणतन्त्र असफल भएको दाबी गरे । यसको प्रमाण भनेको अहिले देश भ्रष्टाचारको दलदलमा भासिएको बताए । केही सीमित दलका सीमित नेताहरूले सिन्डिकेट खडा गरेर देशमा ब्रम्हलुट गरिरहेको उनले आरोप लगाए ।

मुलुकमा राजासहितको प्रजातन्त्र तथा हिन्दूराष्ट्र पुनर्स्थापना र निर्वाचन प्रणालीमा सुधार अपरिहार्य रहेको उनले दाबी गरे ।