कोशी प्रदेशको खेलकुद विकास बोर्डले प्रशिक्षक नियुक्तिमा चलखेलको आंशका गरिएको छ । केही दिनअघि मात्रै बोर्डले करार प्रशिक्षक नियुक्ति गरेको थियो । अनियमित तथा धाँधलीपूर्ण तरिकाले खेलकुद प्रशिक्षक छनोट गरिएको भन्दै मुख्यमन्त्री कार्यालयमा उजुरीसमेत परेको छ । उजुरी परेपछि कार्यालयले सामाजिक विकास मन्त्रालयलाई छानबिन समिति गठन गरी प्रतिवेदन बुझाउन पत्राचार गरिसकेको छ । कार्यालयले आइतबार सामाजिक विकास मन्त्रालयलाई पत्राचार गर्दै बोर्डले गरेको नियुक्ति प्रक्रियाको छानबिन गरेर प्रतिवेदन बुझाउन निर्देशन दिएको हो । 

सामाजिक विकास मन्त्रालयलाई लेखिएको पत्रमा भनिएको छ, ‘अनियमित तथा धाँधलीपूर्ण तरिकाले खेलकुद प्रशिक्षक छनोट गरिएको विषयको उजुरी परेको सन्दर्भमा तपसिल विषमा के भएको हो ? त्यहाँ मन्त्रालयबाट एक छानबिन समिति गठन गरी ७ दिन भित्रमा स्पष्ट राय प्रतिक्रिया सहितको प्रतिवेदन पेसगर्न हुन आदेशअनुसार अनुरोध छ । साथै छानबिन प्रतिवेदन पेस भई अन्तिम कारबाही नटुंगिएसम्म लागि सो विषयमा भए/गरेका काम कारबाहीहरू यथास्थितिमा राख्न हुनसमेत अनुरोध छ ।’

१५ खेलका १७ प्रशिक्षक नियुक्तिको प्रक्रिया अगाडि बढेपछि मुख्यमन्त्री कार्यालयले निर्देशन दिएको हो । ११ जनाले भने नियुक्ति पत्र नै बुझिसेकेको बोर्डका सदस्य सचिव हंसराज वाग्लेले बताए । नियुक्ति प्रक्रिया नियम संगत भएकाले आफूले गरेको निर्णयबाट पछि नहट्ने उनले बताए । ‘फुटबल खेलाडी दीपक लिम्बुलगायत अन्य केहीलाई प्रशिक्षक नियुक्ति गर्न दबाब दिएका थिए,’ वाग्लेले भने ‘मैले प्रक्रियाबाट जोसुकै आए पनि भयो भनेको थिएँ । त्यसैलाई इगो बनाए ।’ दीपकको ठाउँमा सुनसरीका सुरेन्द्र तामाङलाई प्रशिक्षक नियुक्त गरिएको छ । 

प्रदेश खेलकुद बोर्डलाई प्रशिक्षक नियुक्तिका लागि मन्त्रिपरिषद्को बैठकले नै २१ लाख रुपैयाँ दिने निर्णय गरेको थियो । ४२ जनालाई ६ महिनाका लागि नियुक्त गर्न प्रदेश सरकारसँग ९६ लाख रुपैयाँ माग गरिएकोमा २१ लाख दिएपछि मासिक ३० हजार  दिने गरी १५ खेलका १७ प्रशिक्षक करारमा नियुक्ति गरिएको वाग्लेले बताए ।

‘विज्ञसहितको समितिले छनोट गरेका प्रशिक्षकलाई नियुक्ति दिइएको हो ।  खेलकुद नबुझ्नेहरूले विरोध गरेका छन् । खेलाडीका पक्षमा राजनीतिजस्तो फोहरी खेल देखाएका छन् । कसलाई कहाँ लहड चल्यो कुन कुन नेताका मान्छे परेनन् भनेर हुँदैन,’ उनले भने, ‘कसले कसरी दबाब दिएका थिए । त्यो सबै रेकर्ड हामीले पनि राखेका छौ । छानबिन गर्ने भनेको अदालतले मात्रै हो ।’ कसले दबाब दिएको भन्ने विषयमा भने सदस्य सचिव वाग्लेले केही खुलाउन चाहेनन् । 

उनले समावेशी तरिकाले ५ महिला प्रशिक्षक पनि छनोट गरिएको जानकारी दिए । तर, सदस्य सचिव वाग्लेले प्रशिक्षक नियुक्ति प्रक्रिया सुरु गर्नुअगाडि नै प्रशिक्षकको नाम तयार गरेको अडियोसमेत बाहिरिएको छ । उनले एमाले अध्यक्ष केपी शर्मा ओलीले समेत थाहा पाउन नहुने अडियोमा बताएका छन् । ‘खेलाडीहरू सबै तयारी राखेका छौं । यो ओलीले समेत थाहा पाउनु हुँदैन । धेरै मान्छेले थाहा पाए भने छनोटमा समस्या हुन्छ । हामीले मान्छे तयारी अवस्थामा राखेका छौ,’ उनले अडियोमा भनेका छन् ।