इन्डियन प्रिमियर लिग (आईपीएल) क्रिकटमा मुम्बई इन्डियन्सले लगातार तेस्रो हार व्यहोरेको छ । गएराति घरेलु मैदान वानखडे स्टेडियममा सम्पन्न खेलमा मुम्बई राजस्थान रोयल्ससँग पराजित भएको हो ।

आइपीएलको जारी सिजनमा मुम्बईको यो तेस्रो पराजय हो । 

टस हारेर पहिले ब्याटिङ गरेको मुम्बईले निर्धारित २० ओभरमा ९ विकेट गुमाएर १२५ रन मात्रै बनाएको थियो । जुन लक्षेय राजस्थान रोयल्स्ले १५.३ ओभरमा चार विकेट गुमाएर पूरा गर्‍यो । राजस्थानका लागि रियान परगले सर्वाधिक ५४ रन बनाए । 

यसअघि पहिले ब्याटिङ गरेको मुम्बईका अधिकांश ब्याटर चलेनन् । कप्तान हार्दिक पान्ड्याले २१ बलमा ३४ रन बनाए । तिलक बर्माले २९ बलमा ३२ रन बनाए । 

टिम डेबिडले १७ रन बनाए । ओपनर इशान किशनले १४ बलमा १६ रन बनाए । अन्य खेलाडीले दोहोरो अंकमा रन बनाउँन सकेनन् । 

मुम्बई यसअघि पहिलो खेलमा गुजरातसँग ६ विकेटले र दोस्रो खेलमा सनराइजर्स हैदरावादसँग ३१ रनले पराजित भएको थियो । खेलेका तीनमध्ये सबैमा हार व्यहोरेको मुम्बई अंकविहीन हुँदै तालिकाको पुछारमा छ ।