युरोपेली च्याम्पियन्स लिग क्वाटरफाइनलको पहिलो लेगमा फ्रेन्च टोली पेरिस सेन्ट जर्मन (पीएसजी)लाई स्पेनिस टोली बार्सिलोनाले हराएको छ । घरेलु मैदान पार्क डेस प्रिन्सेसमा गएराति भएको खेलमा पीएसजीलाई बार्सिलोनाले ३–२ ले हराएको हो ।

खेलको ३७औं मिनेटमा बार्सिलोनाले सुरुवाती अग्रता लिएको थियो । राफिन्हाले गोल गर्दै खेलमा शुरूआती अग्रता दिलाएका थिए ।

दोस्रो हाफको शुरूआती समयमा नै घरेलु टोली खेलमा फर्कियो । ४८औं उसमान डेम्बेलेले गोल गर्दै खेल बराबरीमा ल्याए ।

बराबरीको ३ मिनेटपछि फाबियान रुइजको पासमा भिटिन्हाले गोल गर्दै पीएसजीलाई अग्रता दिलाए । तर, ६२औं मिनेटमा पेड्रीको सुन्दर पासमा राफिन्हाले नै गोल गर्दै खेल २-२ को बराबरीमा ल्याए ।

७७औं मिनेटमा मैदान भित्रिएका आन्द्रेयास क्रिस्टियनसनले गोल गर्दै बार्सिलोनालाई पुनः अग्रता दिलाए ।

सोही समयमा सकिएको अर्को क्वाटरफाइनलको‌ पहिलो लेगमा एट्लेटिको म्याड्रिडले बोरसिया डर्टमुन्डलाई २-१ ले हराएको छ । घरेलु मैदान सिभिटास मेट्रोपोलिटनो स्टेडियममा भएको खेलमा एट्लेटिको म्याड्रिडले बोरसिया डर्टमन्डलाई हराएको हो ।

एट्लेटिको म्याड्रिडका लागि खेलको चौथो मिनेटमा रोड्रिगो डि पलले पहिलो गोल गरे । ३२ औँ मिनेटमा स्याम्युल लिनोले अर्को गोल थपे । बोरसिया डर्टमन्डका लागि सेबास्टेन ह्यालरले खेलको ८१ औँ मिनेटमा गरेको गोलबाहेक अरु गोल हुन सकेन ।

क्वाटरफाइनलको अर्को लेग अर्को हप्ता हुनेछ ।