सरकारले एकैपटक ५ जना सचिवको सरुवा गरेको छ । चैत ३० गते शुक्रवार बसेको मन्त्रिपरिषद् बैठकले ५ जना सचिवको सरुवा गर्ने निर्णय गरेको हो ।

जसअनुसार प्रधानमन्त्री तथा मन्त्रिपरिषद्को कार्यालयका सचिव दिनेश भट्टराईलाई महिला बालबालिका तथा जेष्ठ नागरिक मन्त्रालयमा सरुवा गरिएको छ ।

प्रधानमन्त्री कार्यालयकै सचिव अर्जुन पोखरेललाई  राष्ट्रिय तथ्याङ्क कार्यालयमा सरुवा गरिएको छ । 

महिला बालबालिका मन्त्रालयका सुमन अर्याललाई युवा तथा खेलकुद मन्त्रालयमा सरुवा गरिएको सरकारी प्रवक्ता समेत रहेकी सूचना तथा संचार मन्त्री रेखा शर्माले जानकारी दिइन् ।

उपराष्ट्रपति कार्यालयका सचिव मुकुन्द निरौलालाई संघीय मामिला तथा सामान्य प्रशासन मन्त्रालयमा सरुवा गरिएको छ ।

संघीय मामिलाका विनोद प्रकाश सिंहलाई राष्ट्रिय प्रकृति स्रोत तथा वित्त आयोगमा सरुवा गरिएको छ । सरुवा गरिएका सचिवहरूले आइतवार रमना पत्र बुझेका छन् ।

फागुन २१ गते सत्ता समीकरण फेरिएपछि सचिव सरुवा भएको यो तेस्रो पटक हो ।