सुदूरपश्चिम प्रदेशको मुख्यमन्त्रीको रुपमा नेकपा (एकीकृत समाजवादी)का संसदीय दलका नेता दीर्घबहादुर सोडारीले बिहीवार साँझ पद तथा गोपनीयताको शपथ ग्रहण गरेका छन् । 

प्रदेश प्रमुख नजिर मियाँले  नेपालको संविधानको धारा १६८ को उपधारा २ अनुसार शपथ गराएका हुन् । सोडारी बिहीवार नै मुख्यमन्त्रीमा नियुक्त भएका हुन् ।

मुख्यमन्त्री सोडारीलाई  नेकपा (एमाले) र नेकपा (माओवादी केन्द्र)को १०–१०, एकीकृत समाजवादीको चार, नागरिक उन्मुक्ति पार्टी (नाउपा)का सातमध्ये दुई र एक स्वतन्त्र गरेर २७ जनाको समर्थन छ । सो सङ्ख्या सुदूरपश्चिम प्रदेशसभाको बहुमत हो । ५३ सदस्यीय प्रदेशसभामा हाल ५२ जना सदस्य रहेका छन् ।

सुदूरपश्चिममा मुख्यमन्त्री कमलबहादुर शाहले विश्वासको मत नपाउने भएपछि चैत २२ गते पदबाट राजीनामा दिएका थिए । उनी नेपाली कांग्रेसबाट मुख्यमन्त्री बनेका थिए ।

यसैबीच एमालेको सुदूरपश्चिम संसदीय दलले तत्काल प्रदेश सरकारमा सहभागी नहुने निर्णय गरेको संसदीय दलका नेता राजेन्द्रसिंह रावलले बताए ।

‘अहिलेलाई समर्थन गर्ने र बाहिरबाट सहयोग गर्ने निर्णय गरेका छौँ । अर्को निर्णय नहुँदासम्म सरकारमा सहभागी नहुने निर्णय गरेका छौँ,’ उनले भने ।

यस्तै माओवादी केन्द्रले पनि सरकारमा मन्त्री पठाउन हतार नगर्ने जनाएको छ । पार्टीभित्र वृहत् छलफल गरेर सरकारमा मन्त्री पठाउने तयारी सुदूरपश्चिमको माओवादी केन्द्र संसदीय दलको छ ।

नाउपाका दुईजना प्रदेशसभा सदस्य कैलाश चौधरी र टीका थापालाई मन्त्रीको शपथ खुवाउने तयारी थियो । समर्थन गर्नुअघि कैलाश चौधरीलाई भौतिक पूर्वाधार विकास मन्त्रालय दिने र थापालाई बिना विभागीय मन्त्री बनाएर शपथ खुवाउने भनिएको थियो । तर शपथ ग्रहणका बेला दवैलाई बिना विभागीय मन्त्री बनाउने कुरा आयो । यसपछि दुवैले मुख्यमन्त्रीको शपथग्रहण समारोह बहिस्कार गरेर बाहिरिएका थिए ।

यसैबीच मुख्यमन्त्री सोडारीले बिहीवार साँझ नै पदभार ग्रहण गरिसकेका छन् ।