एसीसी प्रिमियर कपको सेमिफाइनलमा आज नेपालले यूएईसँग प्रतिस्पर्धा गर्दै छ । ओमानमा जारी प्रतियोगितामा नेपाल र यूएईबीचको खेल बिहान ११:४५ बजे शुरू हुनेछ । 

ओमानको अल अमरेत क्रिकेट मैदान टर्फमा हुने खेल नेपालका लागि आजको खेल निकै महत्वपूर्ण छ । यूएईलाई हराउँदै सेमिफाइनल यात्रा तय गर्नु त छँदै छ सन् २०२२ मा भोगेको हारको बदला लिने अवसरसमेत नेपाली टोली सामु छ।  

नेपाल र यूएई चिर परिचित प्रतिद्वन्द्वी हुन् । 

सन् २०२२ को फेब्रुअरीमा यही मैदानमा नै भएको आईसीसी टी-२० विश्वकप छनोटमा यूएईसँग पराजित हुँदै नेपालको विश्वकप खेल्ने सपना अधुरै रहेको थियो । सन् २०१४ पछि विश्वकप खेल्ने योजनामा रहेको नेपाली टोलीको बाटोमा यूएई बाधक बनेको थियो । नेपाली टोली दुई वर्षअघि सोही मैदानमा भोगेको हारको बदला लिने दाउमा हुनेछ ।

दुई वर्षअघिको त्यो हारको बदला लिँदै नेपाल फाइनलमा स्थान पक्का गर्ने सोचमा छ । पछिल्लो एक वर्षमा नेपालको सुधार लोभलाग्दो छ । युएईको टोलीमा खासै परिवर्तन छैन ।

दुई टोली पछिल्लो पटक गत मंसिरमा घरेलु मैदानमा भएको आईसीसी टी–२० विश्वकप एसिया छनोटको सेमिफाइनलमा आमने-सामने भएका थिए । मूलपानी मैदानमा भएको खेलमा नेपालले यूएईलाई ८ विकेटले पराजित गर्दै १० वर्षपछि विश्वकपको ढोका खोलेको थियो । 

नेपाली टोली जारी प्रिमियर कपमा अपराजित टोली हो । नेपालले समूह चरणका चार खेलमा चार जीत निकालेको थियो । यूएई भने समूह चरणमा ओमानसँग हारेको थियो । 

टी–२० क्रिकेटमा नेपाल र यूएई अहिलेसम्म ९ पटक भेट भएका छन् । ती भेटमा यूएईविरुद्ध नेपाल हाबी देखिएको छ। 

नेपालले ५ खेलमा जीत निकाल्दा यूएईले भने चार खेलको नतिजा आफ्नो पक्षमा पारेको छ । पछिल्ला ५ भेटलाई हेर्ने हो भने नेपालले ३ खेलमा जीत निकालेको छ। यूएईले भने दुई खेलमा मात्र विजयी भएको छ ।

आजै हुने दोस्रो सेमिफाइनलमा समूह बी को विजेता ओमानले समूह ए को उपविजेता हङकङसँग खेल्नेछ। सो खेल सवा ४ बजे शुरू हुनेछ । 

प्रिमियर कपको विजेताले टी २० एसिया कपमा स्थान बनाउनेछ । एसिया कपमा पुग्ने टोलीले भारत र पाकिस्तानसँग खेल्ने मौका पाउनेछन् ।

नेपालको टोली :

रोहित पौडेल (कप्तान), आसिफ शेख, कुशल भुर्तेल, कुशल मल्ल, विवेक यादव, सन्दीप जोरा, अनिल शाह, गुलशन झा, दीपेन्द्रसिंह ऐरी, ललित राजवंशी, करण केसी, सोमपाल कामी, प्रतिश जि.सी. र अभिनाश बोहरा ।

यूएईको टोली :

मोहम्मद वासिम (कप्तान), आयन खान, एलिशान शराफु, अली नासिर, आसिफ खान, बासिल हामिद, जुनैद सिद्दिक, मोहम्मद फारुक, मोहम्मद हैदर शाह, ओमैद रहमान, राहुल भाटिया, राजा अकिफ, टानिश सुरी र विष्णु सुकुमारान ।