संविधान संशोधनसहित सत्ता सहकार्यको मस्यौदामा सहमति, देउवा र ओलीद्वारा हस्ताक्षरको तयारी

संसदका दुई ठूला दल कांग्रेस र एमालेबीच नयाँ सत्ता समीकरण बनाउने समझदारी भएको छ । निरन्तरको गृहकार्यपछि कांग्रेस र एमालेका शीर्ष नेताले सोमबार मध्यराति नयाँ सत्ता समीकरण बनाउनेबारे सहमति गरेका हुन् ।

सम्झौतामा कांग्रेस सभापति शेरबहादुर देउवा र नेकपा एमाले अध्यक्ष केपी शर्मा ओलीले हस्ताक्षरको तयारी गरेका छन् ।

स्रोतले लोकान्तरलाई दिएको जानकारीअनुसार उक्त सम्झौतामा सरकारको नेतृत्व पहिले एमाले अध्यक्ष ओलीले लिने उल्लेख छ ।

उक्त सरकारलाई 'राष्ट्रिय सहमतिको सरकार'को नाम दिने विषयमा छलफल चलिरहेको छ । त्यसको डेढ वर्षपछि २०८४ को चुनावी सरकारको नेतृत्व कांग्रेस सभापति शेरबहादुर देउवाले गर्ने भएका छन् ।

राष्ट्रिय सहमतिको सरकारमा सहभागी हुन अहिले प्रधानमन्त्री रहेका पुष्पकमल दाहाल 'प्रचण्ड' नेतृत्वको पार्टी नेकपा माओवादी केन्द्र, राष्ट्रिय स्वतन्त्र पार्टी र अन्य दललाई पनि आह्वान गरिने समग्र प्रक्रियामा सहभागी एक नेताले लोकान्तरलाई बताए । 

सरकारमा एमालेले अर्थ मन्त्रालयसहित ९ वटा मन्त्रालय पाउनेछ । कांग्रेसको भागमा गृहसहित १० वटा मन्त्रालय पर्नेछन् । बाँकी मन्त्रालय साना दलको लागि राखिने भएको छ ।

साना दलको निरन्तरको बार्गेनिङपछि जनतामा निराशा छाएको भन्दै प्रमुख दुई दलले जनतालाई सकारात्मक सन्देश दिने गरी सरकारले काम गर्ने दाबी गरेका छन् ।

संविधान संशोधन, निर्वाचन प्रणालीमा सुधार, प्रदेश संरचनाका विषयमा देखिएका त्रुटीलाई सच्याउने, अर्थतन्त्र सुधारमा काम गर्ने प्रतिवद्धता दुवै दलले व्यक्त गरेका छन् ।

दलहरुबीच स्थानीय तहको संख्या घटाउने विषयमासमेत छलफल भएको नेताहरु बताउँछन् ।

सातवटै प्रदेश सरकारमा भागबण्डा

दुई दलबीच सातवटै प्रदेश सरकारमा पनि भागबण्डा भएको छ । जसमा बागमती, गण्डकी र सुदूरपश्चिम प्रदेश सरकारको नेतृत्व कांग्रेसले गर्नेछ ।

त्यस्तै एमालेले कोशी, कर्णाली, लुम्बिनी प्रदेश सरकारको नेतृत्व गर्ने भएको छ । मधेस सरकारको नेतृत्व मधेस केन्द्रित दलबाट हुने समझदारी जुटेको छ ।

नागरिकमा निराशा छाएको भन्दै संविधान संसोधनको लागि पूर्व प्रधानन्यायाधीश कल्याण श्रेष्ठको नेतृत्वमा संविधान संसोधन सुझाव समिति पनि बनाउने सहमति पनि भएको छ ।

यस अघि गत वैशाखमा पनि कांग्रेस र एमाले मिलेर सरकार बनाउने समझदारीनजिक पुगे पनि त्यो प्रयास स्थगित भएको थियो । तर यसपटक देउवा र ओलबीच दुई तीन चरणको छलफलपछि असार १५ गते बालकोटमा तीन घण्टा लामो छलफल भएको थियो । सोही छलफल अनुसार दुवै दल नयाँ समीकरणमा सहमत भएका हुन् ।

शीर्ष तहमा सहमति जुटेपछि कांग्रेसका रमेश लेखक र ज्ञानेन्द्रबहादुर कार्की र एमालेका तर्फबाट उपाध्यक्ष विष्णु पौडेल र महासचिव शंकर पोखरेलले मन्त्रालय, प्रदेशसहितको भागबण्डाको विषय टुंग्याएका हुन् ।

ललितपुरस्थित एक होटेलमा दोस्रो तहका नेताबीच सहमति जुटाइएको थियो । त्यसपछि कांग्रेस र एमालेका नेताले आन्तरिक छलफल गरेर सहमतिलाई अन्तिम रुप दिएको स्रोतको दाबी छ ।

कार्यदलस्तरमा सहमति जुटेपछि कांग्रेसका शीर्ष नेता ओलीसँगको छलफलका लागि मध्यरात बालकोट पुगेका थिए ।

प्रचण्ड नेतृत्वको सरकारलाई विस्थापित गरेर नयाँ सरकार गठनको प्रक्रिया प्रवेश गर्नु अघि कांग्रेस र एमालेका शीर्ष नेता सोमबार मध्यरात नै राष्ट्पति निवास शीतलनिवास जाने तयारी गरेका छन् ।

अहिलेका प्रधानमन्त्री पुष्पकमल दाहाल 'प्रचण्ड'संविधानको धारा ७६(२) अनुसार प्रधानमन्त्रीले बनेकोले ओलीले प्रचण्ड विस्थापित हुँदा पनि यही धारामार्फत आफू प्रधानमन्त्री हुने ग्यारेन्टी खोजेका छन् ।  

यसका लागि राष्ट्रपति रामचन्द्र पौडेलसँगै छलफल गर्नुपर्ने एमाले नेताहरूको तर्क छ ।